Австралияда номаълум космик объект топилди (видео)

Ғарбий Австралиядаги Перт шаҳридан 250 км узоқликда жойлашган Green Head соҳилидан номаълум космик объект топилди. Бу ҳақда “The Guardian” нашри хабар бермоқда.

15 июль куни полицияга маҳаллий аҳолидан  номаълум объект ҳақида маълумот келиб тушган. Мис рангли ушбу улкан объект цилиндр шаклига эга. У сезиларли даражада шикастланган ва бир томонга оғган ҳолда топилган.

Полиция объектнинг 2014 йил Куала Лумпурдан Пекин томон саёҳати вақтида ғойиб бўлган  МH370 флоти эканлиги ҳақидаги фикрни рад этди.

"Биз объектнинг келиб чиқиши ва табиатини аниқлаш учун турли давлат ва федерал идоралар билан ҳамкорликда иш олиб боряпмиз. Тергов давом этмоқда ва қўшимча маълумотлар аниқланмагунича барчани хулоса чиқаришдан тийилишга чақирамиз", дейилади полиция баёнотида.

Кўпчилик ижтимоий тармоқларда ушбу объект Ҳиндистоннинг Polar сунъий йўлдошини ишга тушириш учун учирган ракетасининг бир қисми эканлигини тахмин қилмоқда. Космик археология соҳаси мутахассиси доктор Алиcа Горман ҳам бу фикрни қўллаб-қувватлашини билдирган.

Эслатиб ўтамиз, шу ой бошида Британиянинг Медуэй дарёси бўйларидан қадимги даврга оид 800 дона тош қуроли топилган.

Севара Ҳусниддинова