Аргентина FIFA рейтингида биринчи ўринга қайтди

Кеча, 4 май куни Франция ва Испания терма жамоаларининг ўртоқлик учрашувларидаги муваффақиятсизлигидан сўнг Аргентина терма жамоаси FIFA онлайн рейтингида биринчи ўринга кўтарилиб олди.

Французлар Кот-д’Ивуарга қарши ўртоқлик учрашувида 1:2 ҳисобида мағлуб бўлганидан сўнг 7,89 рейтинг очкосидан маҳрум бўлди ва натижада учинчи ўринга тушиб кетди.

Испания ҳам Ироқ билан 1:1 ҳисобидаги дурангдан кейин 3,38 очко йўқотди. Шунга қарамай, испанияликлар жаҳон рейтингида иккинчи ўринни сақлаб қолди. Марокаш Мадагаскар устидан 4:0 ҳисобида ғалаба қозонгач, бир поғона юқорилаб, еттинчи ўринга кўтарилди. Аксинча, Нидерландия Жазоирга 0:1 ҳисобида мағлуб бўлиб, 6,78 очко йўқотди ва саккизинчи ўринга тушиб кетди. 2026 йилги Жаҳон чемпионати бошланишига бир ҳафта вақт қолгани сабабли, кўплаб миллий терма жамоалар мусобақага тайёргарлик кўриш мақсадида ўртоқлик учрашувлари ўтказмоқда. Шу боис яқин кунларда FIFA рейтингида яна бир қатор ўзгаришлар кузатилиши мумкин.

Маълумот учун, Ўзбекистон миллий терма жамоаси Канадага қарши учрашувдаги мағлубиятдан сўнг FIFA’нинг онлайн жадвалида 4 очко йўқотган бўлишига қарамай ҳали ҳам 1461,21 очко билан 50-ўринни эгаллаб турибди. FIFA миллий терма жамоаларнинг янгиланган рейтингини жорий йилнинг 11 июнь куни расман эълон қилади.