Аномал илиқ кескин совуқ билан алмашади – Ўзгидромет

Бугун, 4 февраль куни Ўзбекистон ҳудудига Туркманистон ҳудудларидан жуда илиқ ва қуруқ ҳаво кириб келиши кутимоқда. Ҳарорат фони кўп йиллик қийматлардан 5-7о га юқори бўлади. Бугун кундуз куни ҳаво 12-14 даража илиққача, баъзи жойларда 16-18 даража илиққача исийди. Бу ҳақда Гидрометерология хизмати маркази маълум қилди.

Эртага илиқ ҳаво массасининг кириб келиши кучаяди, кундуз кунги ҳарорат 14-17 даража илиққача, баъзи жойларда 20-22 даража илиққача кўтарилади, кечаси бироз совуқ сақланиб туради. Республика ҳудудининг катта қисмида ёғингарчилик кутилмайди, фақат республиканинг шимолий ҳудудларига Волга бўйи ҳудудларидан нам ҳаво массаси кириб келиши прогноз қилинмоқда. Қорақалпоғистонда ва Хоразм вилоятида баъзи жойларда ёмғир ёғади.

Якшанба куни совуқ ҳаво кириб келиши Ўзбекистоннинг барча ҳудудларини қамраб олади, об-ҳаво кескин ёмонлашади. Мамлакат бўйича ёмғир ёғади, шимолда ёғингарчилик (ёмғир, қор) бўлади, ҳарорат кундуз куни 4-9 даража илиққача, шимолда 0-5 даража илиққача пасаяди.

4-6 февралда республика бўйича баъзи жойларда шамол кучайиши кутилмоқда, айрим жойларда чанг тўзон кузатилади, жумладан :

•    4 февралда Қорақалпоғистонда, Хоразм, Навоий, Тошкент вилоятларида  18-23 м/с гача;

•    5-6 февралда Қорақалпоғистонда, Хоразм, Бухоро, Навоий, Тошкент, Самарқанд, Жиззах, Сирдарё, Қашқадарё, Сурхондарё вилоятларида
•    18-23 м/с гача, Навоий, Тошкент, Жиззах вилоятларининг айрим жойларида эса 25-28 м/с гача кучайиши мумкин.

Якшанба куни тоғ олди ва тоғли ҳудудларда баъзи жойларда ёғингарчилик кучли бўлиши мумкин. Тоғли автомобил йўлларда қор уюмлари ва кўриниш ёмонлашиши кутилмоқда.