АҚШда самолёт қулаб тушди. Бортдагиларнинг барчаси ҳалок бўлди

Кеча, 4 октябрь куни Бермуда оролларидан Бостонга учаётган тиббий самолёт Нантакет қирғоқлари яқинида ҳалокатга учради. Бортдаги олти кишининг барчаси ҳалок бўлган. Бу ҳақда BBC хабар берди.

Қайд этилишича, бортида олти киши бўлган Gulfstream G-100 самолёти Бермуда олларидан учиб чиққанидан сўнг ҳалокатга учраган. Самолёт парчалари Массачусетс штатидаги Нантакет қирғоқлари яқинидан топилган.

АҚШ Соҳил муҳофазаси хизмати омон қолганларни қидириш операцияси якунланганини эълон қилган.

“Эндиликда биз юракни ларзага солувчи ҳақиқат билан юзма-юз келишга мажбурмиз: “Heartbeat 104” бортида бўлган Latitude жамоамизнинг тўрт нафар аъзоси, беморимиз ва беморнинг оила аъзоси ҳалок бўлган деб ҳисобланмоқда”, дейилади Latitude Air Ambulance тиббиёт муассасаси баёнотида.

Қайд этилишича, бортда Канаданинг тўрт нафар ва Бермуда олларининг икки нафар фуқароси бўлган. Икки нафар учувчи ва икки нафар тиббиёт ходими бемор ва унинг яқинини олиб келиш учун йўлга чиққан бўлган.

Эслатиб ўтамиз, аввалроқ Амур вилоятида Россия ҳарбий самолёти ҳалокатга учраган эди. Оқибатда олти киши ҳалок бўлган, бир киши шифохонага ётқизилган.