АҚШда ҳарбий вертолёт қулаб тушди. Қурбонлар бор (видео)

АҚШ армиясининг Форт-Худ базасига бириктирилган “Апачи” ҳарбий вертолёти Техас штатида ҳалокатга учраши оқибатида 2 нафар аскар ҳалок бўлди. Бу ҳақда Белл округи шерифи идораси ва Форт-Худ базаси маълум қилди.

Қайд этилишича, ҳодиса кеча, 12 август куни Техаснинг марказ шаҳри Остиндан қарийб 100 километр шимолда жойлашган Белл округида юз берган. Вертолёт дала ҳудудига қулаган ва бунинг ортидан катта майдонда ёнғин бошланган.

Белл округи шерифи идораси вакили Клифф Коулманнинг маълум қилишича, воқеа жойида судья вертолёт бортида бўлган 2 кишининг ҳалок бўлганини тасдиқлаган.

“Бугун “Апачи” вертолёти Форт-Худдаги операциялар вақтида Белл округида ҳалокатга учради ва армиямизнинг 2 нафар ҳарбий хизматчиси ҳалок бўлди”, деган Техас губернатори Грег Эбботт.

Форт-Худ базаси ҳам AH-64 ҳужумкор вертолёти ҳалокатга учрагани ва 2 нафар аскар ҳалок бўлганини тасдиқлаган. Бироқ уларнинг шахсига оид маълумотлар қариндошларига хабар берилгунига қадар ошкор қилинмаган.

Ҳодиса жойида бир нечта маҳаллий ёнғин хавфсизлиги бўлинмалари ишлаган. Улар катта майдонга тарқалган ёнғинни ўчиришга ҳаракат қилган.

Ҳодиса жойидан олинган тасвирларда ўт ўчирувчилар куйган дала ҳудудидаги вертолёт қолдиқларини текшираётгани, воқеа жойидан эса тутун кўтарилаётгани акс этган.

Эслатиб ўтамиз, аввалоқ АҚШнинг Юта штатида ўрмон ёнғинини ўчириш ишларида қатнашаётган вертолёт ҳалокатга учраганди.