АҚШ янги божлар ва янги муддатни эълон қилди

АҚШ Президенти Дональд Трамп бир қатор давлатларга нисбатан янги божхона тўловларини жорий этиш тўғрисидаги фармон чиқарди. Ҳужжат кеча, 31 июль куни Оқ уй сайтида эълон қилинди.

Баъзи энг юқори тарифлар Швейцария (39%), Сурия (41%), Лаос ва Мьянма (40%), шунингдек, Ироқ (35%), Қозоғистон (25%) ва Ҳиндистон (25%) учун белгиланган. Европа Иттифоқи, Япония ва Жанубий Корея учун 15% қўшимча тўлов кўзда тутилган. Рўйхатда бўлмаган мамлакатларга 10% лик ягона тариф қўлланилади.

Мажбуриятлар 7 августдан кучга кириши керак. DPA'нинг нима учун божларнинг кучга кириш санаси аввал кутилганидек 1 август эмаслиги ҳақидаги саволига жавобан америкалик расмий янги қоидаларни амалга ошириш учун кўпроқ вақт кераклигини айтди.

Оқ уй ҳужжатига кўра, бу чора “америкалик ишчилар манфаатларидан келиб чиққан ҳолда глобал савдони қайта қуриш”га қаратилган.

Эслатиб ўтамиз, АҚШ Президенти Дональд Трамп ва Еврокомиссия раҳбари Урсула фон дер Ляйен 27 июль куни Европа Иттифоқи ва АҚШ ўртасида савдо битими имзоланганини эълон қилганди. Келишув Трамп аввалроқ таҳдид қилган Европа Иттифоқи маҳсулотларига АҚШга олиб кириладиган тарифларни 30 фоизгача оширишнинг олдини олди.

Келишув доирасида Брюссель АҚШ иқтисодиётига 600 миллиард доллар миқдорида қўшимча сармоя киритишни ва НАТО доирасидаги янги мудофаа буюртмаларини ҳисобга олмаганда, АҚШнинг энергия ресурсларини 750 миллиард долларга сотиб олишни ваъда қилди.