АҚШ яқин кунларда Ғазони тиклаш марказини ишга туширади – ОАВ

Яқин кунларда Ғазони қайта тиклашни назорат қилувчи қўмондонлик маркази иш бошлаши ва уни АҚШ мувофиқлаштириши кутилмоқда. Бу ҳақда ўз манбаларига таяниб, ABC News хабар берди.

Телеканалга кўра, АҚШ раҳбарлигидаги ва Исроилда жойлашган, Ғазода ўт очишни тўхтатиш бўйича келишувни бажариш учун масъул бўлган мувофиқлаштирувчи марказ яқин кунларда фаолиятини бошлайди. Манбалар, шунингдек, ушбу марказга АҚШда таниқли бўлган, аммо ҳозирча исми ошкор этилмаган генерал раҳбарлик қилишини билдирган. Кутилишича, қўмондоннинг хорижлик ўринбосари бўлади.

“Марказ Исроилда, Ғазонинг шимоли-шарқида жойлашган, аммо хавфсизлик сабабли аниқ жойлашуви жамоатчиликка маълум қилинмайди. Расмийлар марказ Исроил ҳарбий базасида жойлашмаслигини, бу эса Ғазони қайта тиклашда иштирок этаётган бошқа давлатлар вакиллари учун очиқликни таъминлаш мақсадида эканини айтишди. Марказ икки йиллик урушдан кейин Ғазони тиклаш ва хавфсизликни таъминлаш учун зарур бўлган фавқулодда логистика ишларини амалга оширишдаги асосий элемент сифатида кўрилмоқда”, дейилади хабарда.

Қайд этилишича, АҚШ Президенти Дональд Трамп оғир юкларни ташишни мувофиқлаштириш учун 200 нафар америкалик ҳарбий хизматчини юборган. Бу ҳарбий бўлинмалар транспорт, режалаштириш, логистика ва хавфсизлик бўйича ихтисослашган.

Эслатиб ўтамиз, жорий ҳафтанинг бошида Дональд Трамп бошқа давлатлар раҳбарлари билан биргаликда Мисрда ўтган саммитда Ғазо бўйича тинчлик келишувига имзо чеккан эди.