АҚШ Венесуэлага биринчи марта ҳужум қилди

АҚШ Венесуэлага биринчи ҳаво ҳужумини амалга оширди. Бу ҳақда кеча, 29 декабрь куни Исроил Бош вазири Биньямин Нетаньяху билан учрашув олдидан АҚШ Президенти Дональд Трамп маълум қилди. 

“Улар кемаларга гиёҳванд моддалар юклаётган портда катта портлаш содир бўлди. Биз барча кемаларга зарба бердик ва энди улар буларнинг барчасини қилган ҳудудга зарба бермоқдамиз. У йўқ бўлиб кетди”, деди Трамп Флоридада.

Трамп 26 декабрда Нью-Йоркдаги WABC радиостанциясига берган шундай деганди: 

“Уларнинг кемалар келаётган катта заводи ёки катта иншоотлари бор. Биз уни икки кун олдин ўчириб қўйдик”.

АҚШ ҳарбийлари ҳам, Венесуэла расмийлари ҳам бундай ҳужум ҳақида расман хабар беришмади. Илгари АҚШ ҳарбийлари фақат гиёҳванд моддалар ташишда айбланган Венесуэла кемаларига ҳужум қилган эди. Ҳар бир бундай операция Каракасда кескин танқидларга сабаб бўлди.

Марказий разведка бошқармаси, Оқ уй ва Пентагон ер усти зарбаси ҳақида оммавий ахборот воситаларига изоҳ беришдан бош тортди. Трамп, шунингдек, зарбани қайси АҚШ хавфсизлик агентлиги амалга оширганини аниқ айтмади. Октябрь ойида республикачи Марказий разведка бошқармасига Венесуэлада операциялар ўтказишга рухсат берганини айтганди .

Ижтимоий тармоқларда Маракаибо қирғоқ шаҳридаги Primazol Insumos Químicos кимё заводида портлаш ҳақида хабарлар тарқалди. Компаниянинг ўзи бу электр симларининг носозлиги туфайли омборда содир бўлган ёнғин эканини даъво қилди.

CNN 30 декабрь куни манбаларга таяниб хабар беришича, шу ой бошида Марказий разведка бошқармаси Венесуэла қирғоғидаги “четда жойлашган пирс”га дрон билан зарба берган. Ундан Tren de Aragua гиёҳванд моддалар тўдаси томонидан қайиқларга гиёҳванд моддалар юклаш учун фойдаланилган. АҚШ армиясининг махсус операция кучлари операция учун разведка маълумотларини тақдим этган. CNN хабар беришича, ҳужумда ҳеч ким қурбон бўлмаган.