АҚШ Сенати Эрон билан урушни тўхтатишга зўрға рози бўлди

Кеча, 23 июнь куни АҚШ Сенати Вакиллар палатаси томонидан қабул қилинган ва Эрон билан ҳарбий ҳаракатларни тўхтатишни назарда тутувчи резолюцияни маъқуллади. Бу ҳақда 23 июнь куни “Reuters” агентлиги хабар берди. 

Резолюция 50 сенаторнинг қўллаб-қувватлаши ва 48 сенаторнинг қарши овози билан қабул қилинди. Нашрнинг ёзишича, овоз бериш республикачилар орасида ҳам хавотир кучайиб бораётганини кўрсатган.

Ҳужжатга кўра, АҚШ Президенти Дональд Трамп Эронга қарши ҳарбий операциялар олиб борилаётган ҳудудлардан Америка қўшинларини олиб чиқиши керак. Бироқ нашрнинг ёзишича, резолюция асосан рамзий характерга эга. Трамп унга вето қўя олмаса-да, ҳужжат мажбурий юридик кучга эга эмас.

Овоз беришни ташаббус қилган демократ сенаторлар фикрича, АҚШ Конгресси ҳарбий ҳаракатлар унинг розилигисиз қайта бошланмаслиги кераклиги ҳақида аниқ сигнал бериши лозим.

CNN маълумотига кўра, Трамп маъмурияти ушбу овоз беришни муҳим воқеа сифатида баҳоламаган ва резолюция қабул қилинишини айрим республикачи сенаторларнинг мажлисда қатнашмагани билан изоҳлаган.

Оқ уй, шунингдек, “Америка қўшинларини олиб чиқиш керак бўлган жанговар ҳаракатлар ҳудуди мавжуд эмас, чунки ҳарбий ҳаракатлар 17 апрелдаги ўт очишни тўхтатиш келишуви билан якунланган”, дея баёнот берган.

АҚШ ва Эрон ўртасида сулҳ режими амал қилаётганига қарамай, томонлар кейинчалик ҳам ўзаро зарбалар алмашишда давом этган. Жорий йилнинг июнь ойи ўрталарида Вашингтон ва Теҳрон икки ой муддатга мўлжалланган ўзаро англашув меморандумини имзолади. Ҳужжат барча фронтларда, жумладан Ливанда ҳам ҳарбий ҳаракатларни тўхтатиш, Теҳронга нисбатан санкцияларни юмшатиш ҳамда Эронни тиклаш жамғармасини ташкил этишни назарда тутади. Вашингтон ва Теҳрон ўртасидаги тинчлик келишуви бўйича музокаралар давом этмоқда.

Эслатиб ўтамиз, аввалроқ АҚШ Эрон билан ўтказилган дастлабки музокаралардан сўнг мамлакатга нисбатан қўлланган айрим санкцияларни 60 кун муддатга вақтинча бекор қилганди.