АҚШ Россия иштирокида Украина бўйича “Тинчлик кенгаши” тузмоқчи

Америка Қўшма Штатлари маъмурияти Украинадаги урушни тўхтатиш бўйича келажакдаги келишув бажарилишини назорат қилиш учун махсус “Тинчлик кенгаши” тузиш имкониятини кўриб чиқмоқда. Бу ҳақда “Financial Times”га таяниб  The Moscow Times хабар бермоқда. 

Нашрга кўра, АҚШ Президенти Дональд Трамп раҳбарлик қилиши кутилаётган ушбу кенгаш таркибига Украина, Европа, НАТО ва Россия вакиллари киритилиши кўзда тутилган.

Манбада таъкидланишича, Украина модели формати учун аввал ташкил этилган «Ғазо бўйича тинчлик кенгаши» намуна бўлади.  Ушбу орган кенгроқ ваколатга эга бўлиши ва бошқа халқаро можароларни ҳал қилиш билан ҳам шуғулланиши мумкин.  Нашр суҳбатдошларидан бирининг айтишича, Трамп маъмурияти ушбу кенгашни “БМТнинг потенциал ўринбосари” сифатида кўрмоқда. Гап БМТнинг ролини пасайтириш ва унинг ўрнига янги самаралироқ механизм яратиш ҳақида кетмоқда. Хусусан, америкалик расмийлар мазкур кенгаш нафақат Украина, балки Венесуэладаги инқирозни ҳал қилиш билан ҳам шуғулланишини таклиф қилиб улгуришган. 

Хабарга кўра,  исмини ошкор қилмаган араб дипломати минтақада бундай кенгаш ваколатини кенгайтириш режаларига эҳтиёткорона муносабатда эканини айтиб, буни «ноодатий жараён» деб атаган. Ўз навбатида, америкалик ҳукумат аъзоси  “Тинчлик кенгаши”нинг фаолияти ҳозирда фақат Ғазо сектори атрофида қурилаётганини ва айни пайтда бу доирадан чиқмаганини таъкидлаган. Ушбу ташаббус муҳокамаси фонида бевосита музокаралар ҳам давом этмоқда.

 Бугун 17 январь куни АҚШ ва Украина вакиллари Майамида Россия билан тинчлик келишувига эришиш бўйича музокараларнинг янги босқичини бошлайди. Украина Президенти Владимир Зеленскийнинг таъкидлашича, 20 банддан иборат тинчлик режаси 90 фоизга, хавфсизлик кафолатлари эса 100 фоизга тайёр. Бироқ, томонлар ҳанузгача энг асосий ва баҳсли масала –ҳудудлар бўйича мавжуд келишмовчиликларни бартараф эта олишгани йўқ.

Эслатиб ўтамиз, аввалроқ АҚШ Президенти Дональд Трамп Украина ва Россия ўртасидаги урушни тугатишга қаратилган потенциал тинчлик келишувини Владимир Путин эмас, аксинча, Украина Президенти Владимир Зеленский тўхтатиб турганини маълум қилганди.

Шаҳноза Қурбонбоева