AQSH Karimovning yaxtasini kimoshdi savdosiga qo‘ydi

AQSH Adliya vazirligi Ukrainadagi urush boshlanganidan keyin musodara qilingan va sanksiyaga uchragan rossiyalik milliarder oligarx Sulaymon Karimovga tegishli bo‘lgan Amadea superyaxtasini Kaliforniyaning San-Diyego shahridagi yopiq kimoshdi savdosiga qo‘ydi. Bu haqda bugun, 6 avgust kuni sotuvga qo‘yilgan veb-saytda xabar berildi.

Kimoshdi savdosi joriy yil 10 sentyabrga belgilangan. 106 metrli yaxtaning taxminiy qiymati 325 million dollarni tashkil qiladi. Kimoshdi savdosida qatnashishni xohlovchilar 10 million dollar miqdorida depozit qo‘yishi kerak.

Olti qavatli Amadea (lotin tilidan “Xudoning sevgisi”) suzuvchi saroy hisoblanadi. Bezatishda marmar va nodir yog‘ochdan foydalanilgan, ayrim detallari toshlar bilan bezatilgan. U 8 ta kabinaga ega. Hammasi bo‘lib u 16 mehmon va 36 ekipaj a’zosini sig‘dira oladi. Yaxtada vertolyot maydonchasi, suzish havzasi, sport zali, kurort, konferensiya zali, vino yerto‘lasi va omar akvariumi mavjud. Intererning markaziy elementi qo‘lda bo‘yalgan Pleyel royal bo‘lib, uning barcha qismlari, pedallardan tortib ilgaklarigacha 24 karatlik oltindan yasalgan.

Auksion Floridada joylashgan National Maritime Services kompaniyasi tomonidan o‘tkaziladi.

“Bu, ehtimol, har birimiz ko‘rgan eng ta’sirli, murakkab va chiroyli kemadir”, degan uning bosh direktori Bob Toni.

Uning so‘zlariga ko‘ra, bunday kalibrli yaxtani sotib olish imkoniyati “juda kamdan-kam uchraydi – umrida bir marta bo‘lishi mumkin”.

Yaxta 2022 yilning bahorida AQSH talabiga binoan Fijida hibsga olingan va San-Diyegoga olib ketilgan. Karimovning o‘zi yaxtaga egalik qilishini rad etgan. Biroq, AQSH Adliya vazirligi sudga ekipaj ko‘rsatmalari va milliarder Amadea yaxtasining birinchi yo‘lovchisi bo‘lganini ko‘rsatadigan yozuvlarni taqdim etdi. E’lon qilingan ma’lumotlarga ko‘ra, yaxtaning intereri Karimovlar oilasining shaxsiy iltimosiga ko‘ra ta’mirlangan, pitssa pechi va kurortlar o‘rnatilgan. Ekipaj a’zolaridan biriga yaxtada milliarderning sevimli Nike krossovkalaridan bir juftini doimo olib yurish buyurilgan.

Dog‘istonlik Federatsiya Kengashi a’zosi Sulaymon Karimov 2018 yilda “Prezident Vladimir Putin rejimidan manfaatdor bo‘lgan va Rossiyaning g‘arazli faoliyatini ilgari surishda muhim rol o‘ynaydigan” senator sifatida AQSH tomonidan sanksiyalangan edi. Shunga qaramay, AQSH Adliya vazirligiga ko‘ra, 2021 yilda milliarder Amadea’ni ishonchli shaxslar orqali sotib olishga rozi bo‘lgan.

Rasmiy ravishda yaxta sotishdan 30 kun oldin ro‘yxatga olingan Millemarin Investments Ltd. mulkiga aylandi. Kelishuvda Errigan Marine kompaniyasi ham ishtirok etdi, uning nominal egasi ruxsat etilgan yaxta brokeri Imperial Yachts bosh direktori Yevgeniy Kochman.

AQSH Adliya vazirligi bergan ma’lumotga ko‘ra, 2021 yilning oktyabr oyidan yaxta Fiji hukumati tomonidan tortib olingunga qadar Karimov va uning oila a’zolari Amadea bortida bir necha bor sayohat qilgan, yaxtani keng ko‘lamli modernizatsiya qilishni rejalashtirgan, uzoq muddatli sayohatlar jadvalini tuzgan, shuningdek, barcha texnik xarajatlarni o‘z zimmasiga olgan, unga 2 million dollar sarflagan.

Musodaradan so‘ng, “Rosneft”ning sobiq bosh direktori Eduard Xudaynatov yaxtaga egalik huquqini da’vo qilishga uringan. Biroq, AQSH rasmiylari uni Karimovning egaligini yashirishga uringan front odami, deb bilgan. 2025 yilning iyul oyida Nyu-Yorkdagi federal sudya Amadea’ni kimoshdi savdosiga qo‘yishga ruxsat berdi.

Eslatib o‘tamiz, 2024 yilning fevral oyida AQSH Adliya vazirligi suddan sanksiyaga uchragan rossiyalik milliarder oligarx Sulaymon Karimovga tegishli bo‘lgan Amadea superyaxtasini sotishga ruxsat so‘ragandi.