“АҚШ геноцидга ҳамкор”. Ветеранлар сенаторларни Ғазодаги геноцидга шерикликда айблади (видео)

Жорий йилнинг 3 сентябрь куни АҚШ армиясининг истеъфодаги 2 нафар зобити Ғазодаги ёрдам тарқатиш нуқталарида Исроилнинг ваҳшийликларини фош қилиб, сенаторларни геноцидга ҳамкорликда айблаб чиқди. Бунинг ортидан улар Сенат мажлисидан мажбуран чиқариб юборилган. Бу ҳақда “Democracy now” хабар берди.

“Яшил берет” (АҚШ армиясининг махсус кучлари, “Green beret”) собиқ зобити полковник-лейтенант Энтони Агуилар ва АҚШ разведкасининг собиқ капитани Жозефин Гилбо Вашингтондаги Сенатнинг Ташқи алоқалар қўмитаси йиғилишида ўринларидан туриб, Ғазодаги урушга қарши чиқиш ўзларининг конституцион бурчи эканини эълон қилган.

Агуилар АҚШ томонидан қўллаб-қувватланадиган, Исроил ҳарбийлари назорати остидаги ёрдам тарқатиш пунктларини юритувчи шубҳали пудратчи “Ғазо гуманитар фонди”га (GHF) ошкора қарши чиқиб, фаластинликларнинг ҳуқуқларини ҳимоя қилувчи фаолга айланган. У ўз кўзлари билан гувоҳ бўлган зўравонликлар, жумладан, Амир исмли очликдан азият чекаётган бола ўлдирилганини оммавий ахборот воситаларида ҳикоя қилиб келади.

“Ғазода хизматимдан кейин мен фаластинликларнинг ҳуқуқларини ҳимоя қилувчи фаолликка ўтдим. Мен дунё нималар бўлаётганини билиши учун гапираман”, дея эслайди Агуилар Амирнинг воқеасини.

Агуилар 2024 йилнинг майигача GHF'нинг субпудратчиси UG Solutions’да ишлаган ва ёрдам тарқатиш жойларини: “Олдиндан ўйланган ўлим тузоқлари”, деб таърифлаган. Унинг айтишича, Исроил кучлари пудратчиларга оч қолган тинч аҳолига озиқ-овқат тарқатиш орқали уларни тўплаб, кейин эса одамлар тарқала бошлаганда ўқ узиш, кўздан ёш оқизувчи газ ва миномётлардан фойдаланишни буюрган.

Жорий йилнинг 28 май куни у Амир исмли ялангоёқ ҳолдаги, озиб-тўзиган ва қўлида кичкина гуруч, ясмиқ ва ун солинган халтачани кўтариб кетаётган боланинг инглиз тилида унга миннатдорлик билдирганини кўрганини айтади. Агуиларнинг сўзларига кўра, Амир оиласи ёнига қайтаётганда Исроил кучлари оломонга қарата ўқ узган.

“Амир қўлларини юзимга қўйди, мени ўпди ва “раҳмат” деди. Кейин у бошқалар билан бирга ўққа тутилган. Ўша куни Амир ўлдирилган”, деди Агуилар.

У журналист Такер Карлсон билан суҳбатда Исроилнинг қилмишларини айтиб берган.

“У кичкина болакай, жангчи эмас эди. У ялангоёқ, оч эди. Кейин уни ўлдиришди”, дейди у.

Агуиларнинг сўзларига кўра, Исроилнинг алоқа офицерлари бевосита операцияларни бошқарган, ҳатто болалар одамлар орасида қолиб кетмаслик учун тўсиқлардан ошиб ўтишга уринганда снайперларга уларни отишни буюрган.

“Менга жуда очиқ-ойдин айтишган: бизнинг мижозимиз Исроил армияси”, дея эслайди у.

                                  Сенатдаги чиқиш

Агуиларнинг Сенатдаги норозилиги унинг интервью ва подкастларда бир неча ой давомида Ғазодаги ёрдам тизимини “очлик ўйинлари”га ўхшатиб келганидан кейин юз берган.

Унинг айтишича, фаластинликлар ёрдам пунктларига ялангоёқ ҳолда 12 километргача югуришга мажбур бўлишган, бироқ у ерда “ўққа тутилган” ва кимёвий қуроллар билан тарқатиб юборилган.

“Улар инглизча гапирмайди. Қаерга боришни билмайди. Таржимонлар ёки овоз кучайтиргичлар ўрнига биз қуроллардан фойдаландик”, дейди у.

Жорий йилнинг 3 сентябрь куни Агуилар Сенат эшитувида туриб АҚШ расмийларини геноцидга ҳамкорликда айблаган. Шундан сўнг, у мажлисдан олиб чиқиб кетилган. Ушбу жараёнда Агуиларнинг айтган гаплари ижтимоий тармоқларда тарқалиб, муҳокамаларга сабаб бўлмоқда. 

“Агар АҚШ Конгресси фахрийларни таъқиб қилса, улар сизни ҳам таъқиб қилади. Ҳозир уйда ўтирган ҳар бир америкалик шуни англаб етиши керакки, сиз геноцид учун пул тўлаяпсиз”, дейди у.

Шунингдек, АҚШ разведкасининг собиқ капитани Жозефин Гилбо ҳам Ғазо бўйича гапларидан сўнг Агуилар билан бирга Сенат мажлисидан чиқариб юборилган.

“Бизни ҳозирда номзодлар бўйича ташқи ишлар бўйича тингловни бузганимиз учун ҳибсга олишмоқда, чунки АҚШ геноцидга ҳамкорлик қилмоқда! Улар чақалоқларни қирғин қилишга шерик! Қўзғалинг! Қўзғалинг, Америка! Қўзғалинг! Бу мамлакатни бу коррупсиялашган сиёсатчилардан қайтариб олиш вақти келди”, дейди Гилбо.

Эслатиб ўтамиз, аввалроқ Исроил Мудофаа кучлари (ЦАХАЛ) вакили, бригада генерали Эфи Дефрин Исроил  Ғазо шаҳри ҳудудининг 40 фоизи устидан назорат ўрнатганини айтган эди. ЦАХАЛ вакилининг сўзларига кўра, ҳозирда Зайтун ва Шайх Радван ҳудудларида бўлинмалар ишламоқда. Дефриннинг таъкидлашича, ҳарбий миссия фақат исроиллик барча гаровга олинганлар озод қилинганидан ва ҲАМАС ҳукмронлиги йўқ қилингандан кейингина тугайди.