АҚШ фуқароларини Эронни тарк этишга чақирди

АҚШ Давлат департаменти Эрондаги вазият сабаб ушбу мамлакатда қолаётган фуқароларига мурожаат йўллади. Унда америкаликлар Эронни имкон қадар тезроқ тарк этишга чақирилган.

Мурожаат Эронда давом этаётган норозилик намойишлари билан боғлиқ. Давлат департаментининг таъкидлашича, бу намойишлар зўравонлик босқичига ўтиши мумкин, бу эса ҳибсга олишлар сонининг кўпайишига олиб келади.

Идора маълумотига кўра, мамлакатда йўллар ёпилмоқда, жамоат транспорти ишида узилишлар кузатилмоқда, шунингдек, интернет ва мобил алоқа блокланмоқда.

АҚШ фуқароларига муқобил алоқа усулларини олдиндан режалаштириш ва имкон бўлса, Арманистон, Туркия ёки Туркманистон билан қуруқликдаги чегаралар орқали мамлакатдан чиқиб кетиш тавсия этилган.

Агар мамлакатни тарк этишнинг имкони бўлмаса, хавфсиз жой топиш, уйда ёки бошқа ҳимояланган бинода қолиш, шунингдек, озиқ-овқат, сув, дори-дармон ва зарур буюмлар захирасини тайёрлаб қўйиш кераклиги қайд этилган.

Икки мамлакат фуқаролигига ҳам эга бўлган ақшликларга мамлакатдан чиқишда Эрон паспортидан фойдаланиш тавсия этилган, чунки Теҳрон уларнинг Америка фуқаролигини тан олмайди.

Маълумот учун, Эрон бўйлаб оммавий норозилик намойишлари 2025 йил 28 декабрдан, яъни 16 кундан буён давом этмоқда. Интернет ўчирилгани ва хавфсизлик кучларининг қаттиқ чораларига қарамай, Теҳрон ва бошқа йирик шаҳарларда минглаб одамлар кўчаларга чиқмоқда. Намойишчилар қозон-товоқларни уриб, шовқин кўтармоқда, “Хоманаийга ўлим” деган шиорларни айтмоқда, автомобиль ҳайдовчилари эса сигнал чалиб, уларни қўллаб-қувватламоқда.

10 январь куни “Ислом инқилоби қўриқчилари корпуси” намойишларни куч билан бостириш билан таҳдид қилган. Давлат хавфсизлиги “қизил чизиқ” экани, армия миллий манфаатлар, стратегик инфратузилма ва жамоат мулкини ҳимоя қилиш учун куч ишлатишини маълум қилган.

АҚШ Президенти Дональд Трамп 10 январь куни эронлик намойишчиларга ёрдам беришга тайёрлигини билдирган. 

Бунга жавобан Эрон раҳбарияти АҚШ ёки Исроил томонидан намойишларни қўллаб-қувватлаш мақсадида ҳарбий ҳужум уюштирилса, жавоб зарбалари берилишини айтган. Эрон парламенти спикери 11 январь куни фавқулодда йиғилишда АҚШнинг ҳарбий марказлари ва денгиз қатнови қонуний нишонга айланишини билдирган. Ушбу баёнотлардан сўнг Исроил юқори даражадаги жанговар шайлик ҳолатига ўтгани хабар қилинган. 

Қолаверса, Трамп кеча, 12 январь куни журналистлар билан мулоқотда Теҳрон АҚШнинг ҳарбий ёки тижорат объектларига ҳужум қиладиган бўлса, Эрон мисли кўрилмаган даражада кучли зарбаларга дуч келишини айтганди. Трампнинг сўзларига кўра, агар Эрон бундай ҳужумни амалга оширса, АҚШ шундай куч билан жавоб берадики, Теҳрон бунга ишониши ҳам қийин бўлади. 

Эслатиб ўтамиз, аввалроқ Эронда ҳукуматга қарши намойишлар вақтида ҳалок бўлганлар сони 500 нафардан ошгани ҳақида хабар берилганди.