АҚШ Эрондан ядро дастуридан бутунлай воз кечишни талаб қилмоқда
Олам
−
24 Март 2253
Қўшма Штатлар Эроннинг ядро дастуридан бутунлай воз кечишига интилмоқчи. Бу ҳақда АҚШ Президентининг миллий хавфсизлик бўйича маслаҳатчиси Майк Уолтц CBS News телеканалининг “Face the Nation” дастурида сўз очди.
“Эрон ўз дастуридан бутун дунё кўрадиган тарзда воз кечиши керак, акс ҳолда "оқибатлар" бўлади. Агар Эрон ядровий қуролга эга бўлса, бутун Яқин Шарқ қуролланиш пойгасига ботган бўларди”, деди Уолтц.
Шунингдек, у икки давлат ўртасида дипломатия учун имкониятлар ҳали ҳам мавжудлигини таъкидлади.
Аввалроқ АҚШ Президенти Дональд Трамп “Fox Business Network” телеканалига берган интервьюсида Эрон етакчиси Оятуллоҳ Али Хоманаийга мактуб йўллагани ва Эрон билан ядровий дастур бўйича келишув тузишни афзал кўришини таъкидлаган эди.
“Эрон музокара қилмаса, бу унинг учун жуда ёмон бўлади. Эрон ядро қуролига эга бўлмаслиги керак. Бошқа вариантлар ҳам бор”, деди Америка раҳбари.
Эрон Ташқи ишлар вазири Аббос Ароқчи эса Теҳрон босим остида АҚШ билан музокара олиб бориш ниятида эмаслигини яна бир бор таъкидлади.
Live
Барчаси
