AQSH harbiylari Iroqdagi eng yirik harbiy bazani tark etmoqda

AQSH qo‘shinlari Iroqning g‘arbida, Anbar viloyatida joylashgan eng yirik baza – “Ayn-al-Asad”dan chiqishni boshladi. Bu haqda mamlakatning rasmiy vakillariga tayanib, IRNA xabar berdi.

Qayd etilishicha, bu jarayon xalqaro antiterror koalitsiyasi kuchlarini bosqichma-bosqich olib chiqish doirasida amalga oshirilmoqda.

Ma’lumotlarga ko‘ra, harbiy texnika kolonnalari bazadan chiqib, Kurdistondagi Erbil shahrida joylashgan “Harir” bazasiga yo‘l olgan. Bu koalitsiya kuchlarini olib chiqish bo‘yicha tuzilgan kelishuvga muvofiq bajarilmoqda.

Iroqning “Shafaq” agentligiga ko‘ra, “Ayn-al-Asad” bazasi joriy yilning 15 sentyabr kuni butunlay yopiladi.

2024 yilning sentyabrida AQSH va Iroq o‘rtasida kelishuv imzolangan edi. Unga ko‘ra, xalqaro koalitsiya kuchlari (AQSH boshchiligida) bosqichma-bosqich mamlakatdan olib chiqiladi. Rejaga muvofiq:

• qo‘shinlarning bir qismi 2025 yil sentyabriga qadar Iroqni tark etishi kerak;
• qolganlari esa 2026 yil oxirigacha olib chiqiladi.

Ma’lumot uchun, Iroqning Anbar viloyatida joylashgan “Ayn-al-Asad” bazasi 1980 yillarda Saddam Husayn davrida qurilgan bo‘lib, 2003 yilda AQSH qo‘shinlari Iroqqa kirgach, amerikaliklar nazoratiga o‘tgan va mintaqadagi eng yirik harbiy markazlardan biriga aylangan. AQSH qo‘shinlari Afg‘oniston va Suriyadagi operatsiyalarni ham shu bazadan muvofiqlashtirib kelgan. 2020 yilda Eron generali Qosim Sulaymoniy o‘ldirilgach, Eron bu bazaga raketa hujumi uyushtirgan.