21 октябрь дам олиш куними?

Ижтимоий тармоқларда 21 октябрь куни дам олиш куни экани ҳақида хабарлар тарқалди. Бунга эса шу мазмундаги қонун сурати тарқалгани сабаб бўлди.

Шу сабабда одамлар орасида турли фикрлар юзага келгач, вазиятга қонунчиликка кўра ойдинлик киритишга эҳтиёж пайдо бўлди. 

Ўзбекистон Республикасининг Меҳнат кодексига кўра, қуйидаги кунлар байрам (ишланмайдиган) кунлари ҳисобланади:

•    1 январь – Янги йил;
•    8 март – Хотин-қизлар куни;
•    21 март – Наврўз байрами;
•    9 май – Хотира ва қадрлаш куни;
•    1 сентябрь – Мустақиллик куни;
•    1 октябрь – Ўқитувчи ва мураббийлар куни;
•    8 декабрь – Конституция куни;
•    Рўза ҳайит (Ийд ал-Фитр) диний байрамининг биринчи куни;
•    Қурбон ҳайит (Ийд ал-Адҳа) диний байрамининг биринчи куни.

“Ўзбек тили байрами кунини белгилаш тўғрисида”ги Қонун (10.04.2020 йил, ЎРҚ–615-сон)га кўра, 21 октябрь Ўзбек тили байрами куни этиб белгиланган, ушбу кун дам олиш куни ҳисобланмайди.