20 йиллик ширин хотиралар: Chococream Magic City’да унутилмас юбилей байрамини нишонлади

Болаликнинг севимли таъми, оилавий анъаналар ва авлодларни бирлаштирган ширин лаҳзалар. 25 октябрь куни Тошкентдаги Magic City боғи Chococream брендининг 20 йиллик юбилейи муносабати билан қувонч, мусиқа ва унутилмас таассуротларга бой катта оилавий байрамга мезбонлик қилди.

Йигирма йил – бу шунчаки вақт ўлчови эмас. Бу минглаб оилаларнинг хотиралари, болаликнинг беғубор онлари, бир дастурхон атрофида ўтган самимий суҳбатлар ва авлоддан авлодга ўтиб келаётган ширин анъаналар тарихидир.

2006 йилда ўз фаолиятини бошлаган Chococream бугун кўплаб ўзбекистонликлар учун таниш ва қадрли брендга айланган. Бир пайтлар унинг таъмидан болалигида баҳраманд бўлганлар бугун ўз фарзандлари билан ана шу ширин лаҳзаларни баҳам кўрмоқда.

Айнан шу ғоя – авлодлар ўртасидаги меҳр, яқинлик ва ширин хотиралар – бренднинг 20 йиллик юбилей байрамида ҳам ўз ифодасини топди.

Magic City бир кунга сеҳрли шоколад оламига айланди

Юбилей муносабати билан Magic City ҳудудида ўзига хос эртакона муҳит яратилди. Ранг-баранг декорациялар, ширинликлар шаклидаги безаклар, тематик майдончалар ва Oompa-Loompa қаҳрамонлари меҳмонларни гўё “Чарли ва шоколад фабрикаси” оламига олиб кирди.

Байрамда 2400 дан ортиқ меҳмон иштирок этди. Катталар ва болалар учун тайёрланган интерактив ўйинлар, қизиқарли танловлар, кўнгилочар дастурлар ҳамда ширин совғалар тадбирга янада файз бағишлади.

Айниқса, болаларнинг қувончи, оилаларнинг биргаликда ўтказган вақтлари ва меҳмонларнинг самимий табассумлари байрамнинг энг қадрли лаҳзаларига айланди.

Chococream бу юбилей орқали фақат ўз тарихини нишонлаш билан чекланмади. Бренд ўзига йиллар давомида ишонч билдириб келаётган истеъмолчилар билан қувончни баҳам кўришни мақсад қилди.

“Олтин чипта” – ҳаяжон ва совғаларга бой саргузашт

Байрамнинг энг қизиқарли қисмларидан бири “Олтин чипта” номли интерактив ўйин бўлди.

Меҳмонлар махсус промо пештахталардан бепул чипталар олиб, Chococream тематик зоналари бўйлаб ўзига хос саргузаштга отландилар.

Ҳар бир босқичда иштирокчилар қизиқарли топшириқларни бажариб, чипталарига махсус муҳрлар тўпладилар. Айрим майдончаларда уларни Chococream маҳсулотлари ва ёқимли совғалар ҳам кутиб олди.

Барча шартларни муваффақиятли бажарган иштирокчилар якуний совринли ўйинда қатнашиш имкониятига эга бўлдилар.

Кеча якунида тасодифий танлов орқали 3 нафар омадли ғолиб аниқланиб, уларга бош совринлар топширилди.

Бу жараён байрамга нафақат ҳаяжон, балки оила аъзолари биргаликда иштирок этадиган, қувонч ва таассуротларга бой ўзига хос муҳит ҳам бағишлади.

Севимли санъаткорлар, жонли мусиқа ва ёрқин ҳиссиётлар

Юбилей кечасининг яна бир унутилмас қисми байрам концерти бўлди.

Машҳур хонанда Хамдам Собиров ва Milan Band ўз чиқишлари билан меҳмонларга кўтаринки кайфият улашди. DJ King Macarella эса жўшқин мусиқий сетлари орқали байрам муҳитини янада жонлантирди.

Мусиқа, рақс, болаларнинг шодлиги ва меҳмонларнинг самимий ҳиссиётлари бирлашиб, Magic City’да ҳақиқий оилавий тантана муҳитини яратди.

Бу оқшомда энг катта совға фақат ютуқлар эмас, балки яқинлар билан бирга ўтказилган вақт ва хотирада қоладиган бахтли лаҳзалар бўлди.

2006 йилдан бугунгача: бир маҳсулотдан катта тарих сари

Chococream тарихи 2006 йилда шоколадли ва сутли пасталар ишлаб чиқариш билан бошланган.

Chococream ва Chocotella маҳсулотлари N’Medov компаниялар гуруҳи шаклланишининг илк босқичида муҳим ўрин тутган. Кейинчалик ишлаб чиқариш фаолияти кенгайиб, озиқ-овқат саноатининг турли йўналишларини қамраб олган.

2009 йилда Finland Butter компанияси ташкил этилди ва шу йили ишлаб чиқариш жараёнларини мувофиқлаштириш ҳамда сифат назоратини кучайтириш мақсадида N’Medov гуруҳи шакллантирилди.

Бугун Chococream турли қадоқларда тақдим этиладиган шоколадли пасталари билан истеъмолчиларга таниш. Бренд маҳсулотлари нонушталар, уй шароитида тайёрланадиган десертлар ва оилавий дастурхонларнинг бир қисмига айланган.

Йигирма йиллик тарих давомида маҳсулот турлари ва ишлаб чиқариш кўлами ўзгарган бўлса-да, бренднинг асосий қадрияти - истеъмолчилар ишончига муносиб бўлиш ва уларга ширин лаҳзалар улашиш – ўз аҳамиятини сақлаб келмоқда.

20 йил – бу фақат тарих эмас, келажакда давом этадиган анъана

Chococream’нинг 20 йиллик юбилейи бренд учун муҳим сана бўлиш билан бирга, уни йиллар давомида танлаб келаётган истеъмолчиларга миннатдорчилик билдириш имконияти ҳам бўлди.

Чунки ҳар бир бренднинг ҳақиқий тарихи фақат ишлаб чиқарилган маҳсулотлар ёки ўтган йиллар билан эмас, балки инсонлар қалбида қолдирган таассуротлари билан ўлчанади.

Кечагина Chococream билан болалик хотираларини яратган авлод бугун ўз фарзандлари билан янги ширин анъаналарни давом эттирмоқда.

Magic City’даги юбилей байрами ана шу авлодларни, хотираларни ва қувончли лаҳзаларни бирлаштирган рамзий воқеага айланди.

Chococream – 20 йил бирга, 20 йил меҳр билан, 20 йил ширин хотиралар сари!

Реклама ҳуқуқи асосида