121 киши иштирокида қимор ташкил қилган шахс ушланди

Наманган вилоятининг Янги Наманган туманида 121 нафар фуқаро иштирокида ноқонуний хўроз ўйини ташкил этган шахс қўлга олинди. Бу ҳақда вилоят Ички ишлар бошқармаси хабар берди.

Маълум бўлишича, жорий йилнинг 24 январь куни Наманган вилояти Ички ишлар бошқармаси ва Янги Наманган тумани Ички ишлар бўлими ходимлари томонидан олиб борилган тезкор тадбир давомида уйида 121 нафар фуқаролар иштирокида таваккалчиликка асосланган хўроз ўйинини ташкил этиб келаётган шахс аниқланган. 

Тезкор тадбир давомида 12 дона хўроз ва қиморнинг ҳар бир иштирокчисидан алоҳида йиғилган 12 миллион сўмдан ортиқ пул ашёвий далил сифатида мусодара қилинган. 

Мазкур ҳолат юзасидан қиморхона ташкил этган шахс процессуал тартибда қўлга олиниб, унга нисбатан Янги Наманган тумани Ички ишлар бўлими ҳузуридаги тергов бўлинмаси томонидан Жиноят кодексининг 278-моддаси (Қимор ва таваккалчиликка асосланган бошқа ўйинларни ташкил этиш ҳамда ўтказиш) 1-қисми билан жиноят иши қўзғатилган. Ҳозирда ҳолат юзасидан тергов ҳаракатлари олиб борилмоқда.

Эслатиб ўтамиз, аввалроқ Андижон вилоятининг Шаҳрихон туманида бир гуруҳ шахслар жамланиб, қимор ўйнаётган пайтда қўлга олинганди.

Суннатова Фарангиз