Ҳусанов энг яхши ўйинчи бўлди. “Сити” Лига кубоги ярим финалида ғалаба қозонди

Кеча, 13 январь куни Англия Лига кубоги ярим финали доирасида “Ньюкасл” ва “Манчестер Сити” жамоалари  учрашуви бўлиб ўтди. Унда “Манчестер Сити”  2:0 ҳисобида ғалаба қозонди. Абдуқодир Ҳусанов учрашувнинг энг яхши ўйинчиси деб топилди.

Баҳсда ҳисоб иккинчи бўлимнинг 53-дақиқасида очилди. Голга “шаҳарликлар”нинг янги футболчиси Антуан Семеньо муаллифлик қилди. Ўйиннинг асосий вақтига қўшиб берилган дақиқаларда, аниқроғи 90+8-дақиқада Райан Шеркининг голи якуний ҳисобни 2:0 кўринишига олиб келди.

“Sofascore” портали талқинига кўра, Ўзбекистон миллий терма жамоаси ҳимоячиси Абдуқодир Ҳусанов учрашувдаги ҳаракатлари учун 8,1 балл олди ва ўйиннинг энг яхши футболчиси сифатида эътироф этилди.

Шу тариқа, “Манчестер Сити” Англия Лига кубоги ярим финалининг дастлабки учрашувида ишончли ғалабага эришди. Жамоалар ўртасидаги жавоб баҳси жорий йилнинг 4 февраль куни бўлиб ўтиши режалаштирилган.