Ҳулкар Муртазоева QALAMPIR.UZ таҳририяти Бош муҳаррири ўринбосари лавозимига тайинланди

Журналист Ҳулкар Муртазоева QALAMPIR.UZ таҳририяти Бош муҳаррири ўринбосари лавозимига тайинланди. 

Жорий йилнинг 31 июль куни QALAMPIR.UZ интернет нашри муассиси “QALAMPIR” МЧЖ таъсисчилари томонидан ўтказилган навбатдаги йиғилишда таҳририятнинг 2023 йилнинг биринчи ярим йилликдаги фаолияти, ютуқ ва камчиликлари атрофлича таҳлил қилинди, таҳририятнинг ҳисоботи тингланди. Янги лойиҳалар бўйича таклифлар эшитилди, журналистлар, техник ходимларнинг малакасини ошириш масаласига алоҳида тўхталиб ўтилди.

Йиғилишда янги медиа маҳсулотларини ишлаб чиқариш, уларга креатив ёндашиш ва ёш кадрлар билан ишлаш масаласи ҳам муҳокама қилинди. Шулардан келиб чиқиб, QALAMPIR.UZ журналисти Ҳулкар Муртазоева Бош муҳаррир ўринбосари лавозимига тайинланди.

Ҳулкар Сайдулла қизи Муртазоева 1997 йил Жиззах вилоятида туғилган. Миллати – ўзбек. Маълумоти – олий. 2020 йилда Алишер Навоий номидаги Тошкент давлат ўзбек тили ва адабиёти университети Филология факультети бакалавриатини, 2022 йилда Ўзбекистон журналистика ва оммавий коммуникациялар университетида магистратура босқичини тамомлаган.

2022 йилнинг сентябрь ойидан бошлаб QALAMPIR.UZ интернет нашри мухбири сифатида фаолият бошлаган.