Hokim xizmat xonasida ayol kishini kaltakladi

Qozog‘istonning Aqto‘be viloyati Qandiagash shahri hokimi Kazbek Akkayir ayolga hujum qilganlikda aybdor deb topildi. Bu haqda “Tengrinews.kz” xabar berdi.

Ma’lumotlarga ko‘ra, 39 yoshli amaldor xonasida o‘zi bilan uzoq vaqtdan beri ishqiy munosabatda bo‘lgan ayolni kaltaklagan. Voqea sodir bo‘lgan kuni ayol hokimning xonasiga kirgan va suhbat janjalga aylanib ketgan. Shahar hokimi ayolning tomog‘idan bo‘g‘ib, kaltaklagan. Shundan so‘ng ayol tibbiy yordamga, keyin esa politsiyaga murojaat qilgan.

Sudda Kazbek Akkayir ayol bilan ishqiy munosabatda bo‘lganini tan olgan, biroq uni urganlik haqidagi ayblovni rad etgan.

“Sudlanuvchi oqlov hukmini talab qildi va o‘z aybini tan olmadi. Sud sudlanuvchini Jinoyat kodeksining 109-moddasi (kaltaklash) 1-qismi bo‘yicha aybdor deb topdi va unga  314 560 tenge (7 015 948,13 so‘m) jarima jazosini tayinladi”, deydi Aqto‘be viloyati sudining matbuot kotibi Jansaya Toirova.

Eslatib o‘tamiz, avvalroq Qirg‘izistonning O‘sh shahri sobiq hokimi Aytmamat Qodirboyev korrupsiyaviy ish bo‘yicha hibsga olingan edi.

Bunyod Keldiboyev