Ҳоким билан жанжаллашган директорни ким калтаклагани маълум бўлди

Аввалроқ Сурхондарё вилояти Сариосиё туманидаги 28-мактабнинг директори Т.У. шу муассасада ишловчи ўқитувчининг оила аъзолари томонидан аёвсиз калтаклангани ҳақида хабар берилган эди. QALAMPIR.UZ мазкур ҳолат юзасидан батафсил маълумот олиш мақсадида Т.У. нинг синглиси Т.Г. билан боғланди.

Жабрланувчининг синглиси Т.Г.нинг маълум қилишича, Т.У.ни ўзи раҳбарлик қилаётган мактабда ишловчи ўқитувчи Д.К. (аёл)нинг турмуш ўртоғи Й.М. дўппослаган.

“Опамни ўзи ишлайдиган мактаб ўқитувчисининг эри урган. Ўша аёл турмуш ўртоғини олиб келиб, опамни калтаклатган. Сабабини билмайман, лекин эркак киши аёлни бу даражада урмаслиги кераклигини биламан холос. Аёл кишини уриш у ёқда турсин, унга баланд овозда гапириш ҳам мумкин эмас. Ҳар ҳолда Президентимиз шундай қонун қабул қилган”, дейди Т.Г.

Синглисига кўра, калтакланган мактаб директори Т.У.нинг аҳволи жуда оғир ва у ҳозир Саросиё туманидаги тез ёрдам бўлимига ётқизилган.

Ушбу ҳолат кенг жамоатчиликнинг норозилиги ва муҳокамаларига сабаб бўлаётган бир вақтда вилоят прокуратураси ҳам “тилга кириб”, юқоридаги воқеа бўйича расмий баёнотини эълон қилди.

Прокуратуранинг билдиришича, Т.У. мактаб ўқитувчиси Д.К.нинг дарс соатларини асоссиз равишда камайтирилганлиги сабабли, турмуш ўртоғи Й.М. томонидан уриб, тан жароҳати етказилган.

Терговга қадар текширув ҳаракатлари натижасига кўра, Й.М.га нисбатан Жиноят кодексининг 109-моддаси (қасддан баданга шикаст етказиш) 2-қисми ва 277-моддаси (безорилик) 3-қисми “г” банди билан жиноят иши қўзғатилиб, дастлабки тергов ҳаракатлари бошланган. Шунингдек, гумон қилинувчи шахс процессуал тартибда ушланган.

“Жиноят ишининг тергови вилоят прокуратураси томонидан назоратга олинган”, дейилади баёнотда.

Воқеалар ривожида эса жорий йилнинг 3 август куни Т.У. гап қайтарган вилоят ҳокими Улуғбек Қосимов бу воқеа ҳақида эшитгач, дарров жабрланувчининг ҳолидан хабар олиш учун шифохонага борган.

Ҳокимлик матбуот хизматининг ёзишича, Қосимов бошчилигидаги бутун раҳбарият Т.У. билан юз берган вазиятдан чуқур афсусда.

Эслатиб ўтамиз, 3 августь куни ижтимоий тармоқларда тарқалган видеода вилоят ҳокими Улуғбек Қосимов директорни ўрнидан турғазиб, уни “мактабдаги муҳитни бузганлик”да, “вилоятни бутун дунёга шарманда қилганлик”да айблаганди. Бунга жавобан, директор Т.У. ўзига нисбатан айтилган айбловларни рад этиб, “милтиқ бўлса, отиб ташланг”, дея эътироз билдирган.