Ҳиндистонда янги туғилган чақалоқ тириклайин кўмилди

Ҳиндистонда 20 кунлик қизалоқ тириклайин ерга кўмилган ҳолда топилди. Бу ҳақда BBC хабар берди.

Маълумотларга кўра, чақалоқни қўй боқаётган чўпон тасодифан топиб олган. У тупроқ остидан эшитилган йиғи овозини пайқаб, яқинлашганда ер остидан қизчанинг қўли кўриниб турганини пайқаган. Эркак қишлоқ аҳолисини чақирган, улар эса полицияни хабардор қилган. Ҳуқуқ-тартибот идоралари ходимлари чақалоқни қазиб олиб, шифохонага олиб борган.

Шифокорлар қизалоқ оғир аҳволда олиб келинганини айтган. У бутунлай тупроққа беланган, оғзи ва бурнига қум киргани сабабли бўғилиш аломатлари кузатилган. Унинг танасида ҳашарот чақиши ва эҳтимол, ҳайвон ҳужуми излари ҳам бор эди. Бир сутка ичида аҳволи бироз яхшиланган, аммо кейин инфекция сабаб ёмонлашган. 

“Прогноз ижобий эмас, лекин биз уни қутқариш учун барча имкониятларни ишга солмоқдамиз”, деган шифокор. 

Полиция ҳозирча қизалоқнинг ота-онасини аниқламаган, тергов давом этмоқда.

Нашрнинг ёзишича, бундай ҳолатлар Ҳиндистонда кўпинча ўғил фарзандга бериладиган анъанавий устунлик билан боғлиқ. Ҳуқуқ ҳимоячиларининг таъкидлашича, қиз фарзандлар кўпинча иқтисодий юк сифатида қаралади, айниқса, кам таъминланган оилаларда. Айрим нодавлат ташкилотларнинг ҳисоб-китобларига кўра, Ҳиндистонда миллионлаб қизлар жинсга қараб аборт қилинган ёки чақалоқ ҳолида ўлдирилган. Қонун бўйича бола жинсини туғилмасдан олдин аниқлаш тақиқланган бўлса-да,  клиникалар яширин тарзда ишлашда давом этмоқда.

2019 йилда ҳам шунга ўхшаш воқеа қайд этилган эди – Ҳиндистонда муддатидан олдин туғилган қизча сопол идишга солиниб, тириклайин кўмилган ҳолда топилган ва қутқариб қолинган. 

Эслатиб ўтамиз, аввалроқ Ҳиндистонда шифокорлар ноёб касалликка чалинган чақалоқда муваффақиятли операция ўтказиб, унинг танасидан иккита ривожланмаган эмбрионни олиб ташлаганди.