Ҳиндистонда ушлаб қолинган олтинлар Ўзбекистондан олиб чиқиб кетилганми?

Аввалроқ Ҳиндистоннинг Деҳли шаҳридаги Халқаро аэропортда олтин контрабандаси билан шуғулланган саккиз нафар Ўзбекистон фуқароси қўлга олингани ҳақида хабар берган эдик. QALAMPIR.UZ мазкур ҳолат юзасидан Ўзбекистон Давлат божхона қўмитаси матбуот котиби Ҳусан Тангриев билан боғланди.

Унга кўра, 2022 йил 23 декабрда қабул қилинган ва жорий йилнинг 11 январидан кучга кирган “Заргарлик буюмларини ишлаб чиқариш қувватларини кенгайтириш ва маҳаллий заргарларни ҳар томонлама қўллаб-қувватлаш бўйича қўшимча чора-тадбирлар тўғрисида”ги Президент қарорига биноан жисмоний шахслар қиймати 100 миллион сўмгача бўлган тайёр заргарлик буюмларини йўловчи божхона декларациясини тўлдирмасдан, 100 миллион сўм ва ундан ортиқ бўлганларини йўловчи божхона декларацияси асосида Ўзбекистон божхона ҳудудидан ташқарига олиб чиқиши мумкин.

Заргарлик буюмларини ишлаб чиқарувчи якка тартибдаги тадбиркорлар заргарлик буюмларини йўловчи божхона декларациясини тўлдирган ҳолда, маълумотларни Ташқи савдо операцияларининг ягона электрон ахборот тизимига киритмасдан Ўзбекистон божхона ҳудудидан ташқарига тижорат мақсадларида олиб чиқишларига рухсат этилади.

“Яъни эрта хулоса чиқаришга шошилманг, қайсидир мамлакатда ноқонуний олиб киришда тўхтатиб қолинган товар бошқа мамлакатдан ҳам ноқонуний равишда олиб чиқилганини англатмаслиги мумкин”, дейди Тангриев.

Шунингдек, божхона ходими мазкур тақинчоқларнинг айнан Ўзбекистон ҳудудидан олиб чиқиб кетилгани ёки йўқлигидан бехабарлигини маълум қилди. Унга кўра, ушбу вазиятга аниқ изоҳ бериш имконсиз ва Ўзбекистон ҳудудидан эркин олиб чиқиб кетилиши мумкин бўлган буюмлар қатъий назорат талаб қилмайди. 

“Халқаро аэропортларнинг учиб кетиш залларида масофавий божхона назорати қўлланилади. Яъни, барча йўловчилар ёппасига божхона кўригидан ўтказилмайди. Қолаверса, амалдаги тартибларга кўра, 100 миллион сўмгача, тайёр заргарлик буюмларини республикамиздан эмин-эркин олиб чиқиш мумкин. 

Деҳли аэропортидаги ҳодиса юзасидан ҳар жиҳатдан ўрганиб, сўнгра хулоса қилган маъқул. Жумладан, йўловчилар тиллани айнан биздан олиб чиққанми ёки аэропортда кимдандир қабул қилиб олганми (тилла багаждан эмас, аэропортга тегишли аравачадан топилганига эътибор қаратиш керак)  - булар батафсил ўрганилиши керак, деб ҳисоблайман”, дейди Ҳусан Тангриев.

Эслатиб ўтамиз, аввалроқ Ҳиндистон-Непал чегарасининг Биҳар штати ҳудудидан ноқонуний тарзда ўтаётган пайтда қўлга олингани уч нафар ўзбекистонлик аёл дипломатик миссия кўмагида Ўзбекистонга қайтарилган эди.