Ҳиндистон яна Россия нефтини сотиб олишни бошлади

Ҳиндистон нефтни қайта ишловчи заводлари Россия нефтини катта чегирма билан сотиб олди. Бу ҳақда “Bloomberg” хабар берди.

Нашр маълумотига кўра, Ҳиндистоннинг давлат компаниялари – Indian Oil ва Bharat Petroleum санкциялар остига тушмаган Россия компанияларидан январь ойида етказиб бериладиган нефть хомашёсини сотиб олган. 

Манбаларга кўра, қанча партия сотиб олингани номаълум, аммо улар бир баррелга (0,136 тонна) тахминан 5 долларлик чегирма билан олинган. Нашрнинг эслатишича, бир ой олдин чегирма 3 доллар эди. Шунингдек, чегирма ва ташиш харажатларини ҳисобга олган ҳолда, Россия ҳозирда бир баррель нефтдан ўртача 40–45 доллар ишлаб олиши айтилмоқда. Бу етказиб беришлар БАА дирҳамида тўланмоқда.

Нашрнинг таъкидлашича, бу маълумотлар айрим ҳинд нефтни қайта ишлаш заводларининг Россия нефтига эҳтиёткорона қайтишни бошлаганини кўрсатади. Шунга қарамай, бозордаги бир марталик (спот) харидлар ҳануз чекланган. Вашингтон ва Нью-Деҳли савдо музокараларини давом эттирмоқда, нефть хомашёсини етказиб бериш масаласи эса энг мувозанатли мавзулардан бири бўлиб қолмоқда.

Эслатиб ўтамиз, аввалроқ АҚШ Президент Дональд Трамп Ҳиндистон Бош вазири Нарендра Моди унга Россия нефтини сотиб олишни тўхтатишга тайёр эканини билдирганини айтган эди. АҚШ Президентининг сўзларига кўра, Ҳиндистон Россия нефтини харид қилмаса, вазият анча енгиллашади. Трамп, шунингдек, Хитой ҳам шундай қадам ташлаши кераклигини таъкидлаган. Орадан бироз вақт ўтиб эса, Ҳиндистон Ташқи ишлар вазирлиги Америка Қўшма Штатлари Президенти Дональд Трамп ва Ҳиндистон Бош вазири Нарендра Моди ўртасида телефон орқали мулоқот бўлганини билмаслигини айтди.