“Ҳаммасига Россия айбдор”. Зеленский Трампга жавоб қайтарди

Украина Президенти Владимир Зеленский АҚШ Президенти Дональд Трампнинг Украина Россияга қараганда тинчликка камроқ интилаётгани ҳақидаги сўзларига қўшилмаслигини билдирди. Унинг фикрича, Россиянинг давом этаётган зарбалари Москва келишувларга умуман қизиқмаётганини кўрсатади. Бу ҳақда Зеленский 15 январь куни НАТО Бош котиби Марк Рютте билан телефон орқали суҳбатидан сўнг эълон қилган видеомурожаатида айтиб ўтган.

“Биз Америка билан олиб борилаётган дипломатик ишлар ҳақида ҳам гаплашдик. Украина ҳеч қачон тинчликка тўсқинлик қилмаган ва бундан кейин ҳам тўсқинлик қилмайди”, деган Зеленский Трампнинг сўзларига ишора қилиб. 

Шунингдек, Украина етакчиси ҳаммасига Россия айбдор экани, уни деб украин халқи азоб чекаётганини ҳам қўшимча қилган. 

“Россия ракеталари, Москванинг Украинани йўқ қилишга уринишлари Россияга умуман келишувлар керак эмаслигининг аниқ далилидир. Россия туфайли украиналиклар 20-30 соат давомида электр энергиясидан маҳрум бўлмоқда ва Россия ҳужумлари бизнинг энергетика секторимизни бузмоқда. Шундан келиб чиқадики, босимга Украина эмас айнан Россия муҳтож. Мен бу борада Украинани қўллаб-қувватлаган барчага миннатдорлик билдираман”, дея қўшимча қилган Зеленский. 

Эслатиб ўтамиз, аввалроқ Трамп “Reuters” агентлигига берган интервьюсида Украина Россиядан фарқли ўлароқ, тинчлик келишувини тузишни хоҳламаётганини айтган эди. Трамп ҳаммасига сабаб қилиб Зеленскийни кўрсатган. 

Россия Президенти матбуот котиби Дмитрий Песков ҳам Трампнинг бу баёнотига қўшилишини билдирган.