Байден Зеленскийни Оқ уйга таклиф қилди
Олам
−
11 Декабрь 2023
6053АҚШ Президенти Жо Байден украиналик мавқедоши Владимир Зеленскийни 12 декабрь куни Оқ уйга таклиф қилди. Бу ҳақда Оқ уй матбуот котиби Карин Жан-Пьер маълум қилди.
“Учрашувда Америка етакчиси АҚШнинг Украина халқини Россия босқинидан ҳимоя қилишда қўллаб-қувватлаш борасидаги шаклсиз мажбуриятини ваъда қилади”, дейилади хабарда.
Айтилишича, Байден ва Зеленский Россия ҳужумлари кучайиб бораётгани сабабли Украинанинг шошилинч эҳтиёжлари ва ушбу муҳим дақиқада АҚШнинг доимий қўллаб-қувватлашининг ҳаётий аҳамиятини муҳокама қилади.
Украина Президенти девонига кўра, Зеленский бугун, 11 декабрь куни амалий ташриф билан АҚШга боради.
Вашингтонда муҳокама қилинадиган асосий мавзулар Украина ва АҚШ ўртасидаги мудофаа соҳасидаги кейинги ҳамкорлик, хусусан, қурол-яроғ ва ҳаво ҳужумидан мудофаа тизимларини ишлаб чиқариш бўйича қўшма лойиҳалар, шунингдек, 2024 йилда мамлакатлар ўртасидаги саъй-ҳаракатларни мувофиқлаштириш бўлади.
Эслатиб ўтамиз, кеча, 10 декабрь куни Зеленский Аргентинада янги сайланган Президент Хавьер Милейнинг инаугурациясида иштирок этганди. Шунингдек, у Буэнос-Айресда Лотин Америкасининг учта давлати – Парагвай, Уругвай ва Эквадор Президентлари ҳамда Франция раҳбари Эммануэль Макрон билан ҳам учрашган.
LiveБарчаси