Ўзбекистоннинг энг кекса Иккинчи жаҳон уруши қатнашчиси вафот этди

Бугун, 21 июнь куни Ўзбекистондаги энг кекса Иккинчи жаҳон уруши қатнашчиси Рўзибой Сатторов 116 ёшида вафот этди. Бу ҳақда Қашқадарё вилояти ҳокимлиги матбуот котиби Аҳрор Содиқов маълум қилди.

Маълум қилинишича, Қашқадарё вилоятидан Иккинчи жаҳон урушида 47 минг 51 нафар киши, жумладан, 95 нафар хотин-қиз иштирок этган. Уруш қатнашчиларининг 22 минг 77 нафари фронтдан соғ-омон қайтган бўлиб, улар орасида қамашилик Рўзибой Сатторов ҳам бор эди.
Рўзибой Сатторов нафақат Қашқадарё вилояти, балки бутун Ўзбекистондаги энг кекса Иккинчи жаҳон уруши қатнашчиси сифатида эътироф этилган.

Қайд этиш жоиз, ўтган йили 9 май – Хотира ва қадрлаш куни арафасида Қашқадарё вилояти ҳокими Муротжон Азимов бошчилигидаги раҳбарлар 115 ёшни қарши олган фахрийнинг хонадонига ташриф буюрган эди. Ташриф давомида Ўзбекистон Президенти Шавкат Мирзиёевнинг байрам муносабати билан йўллаган табриги ўқиб эшиттирилган ва пул мукофоти топширилган.

Ўшанда суҳбат чоғида Рўзибой Сатторов самолётда парвоз қилиш бир умрлик орзуси эканини айтган. Шундан сўнг Президент топшириғи билан 115 ёшли фахрийнинг орзусини рўёбга чиқариш мақсадида ҳарбий самолёт ажратилган ва у ҳавога кўтарилиб, узоқ йиллик орзусини амалга оширган эди.