Колумбия Президенти тақиқланган ташвиқот учун лавозимидан четлатилди

Кеча, 10 июнь куни Колумбия Президенти Густаво Петро ўз лавозимидан четлатилди – бу мамлакат тарихида биринчи марта юз бериши. Бу ҳақда “El Tiempo” хабар берди. 

Таҳририят ихтиёрида бўлган ҳужжатга кўра, Петро жорий йил 21 июнгача – президентлик сайловларининг иккинчи тури бўлиб ўтадиган кунга қадар шундай мақомда қолиши керак. Бундан расмий мақсад унинг ташвиқот ишларида қатнашиши ҳамда чап қанот сенатори, Петро партиясидан номзод Иван Сепеда ва ўнг қанот сиёсатчиси Абелардо де ла Эсприелья иштирок этаётган овоз бериш натижаларига таъсир ўтказишининг олдини олишдир.

Қайд этилишича, ушбу қарорнинг ҳуқуқий мақоми дарҳол баҳс-мунозараларга сабаб бўлган. Қоида тариқасида бундай чоралар комиссиянинг ялпи мажлиси, сўнгра бутун Вакиллар палатаси томонидан маъқулланишини талаб қилади. Айбловлар бўйича комиссия аъзоларининг нашрга маълум қилишича, аввал ҳам худди шундай ташаббуслар айнан уларнинг қонунийлигига шубҳа борлиги сабабли рад этилган.

Қарор қабул қилинган пайтда Петро Нью-Йоркда бўлган – у 9 июнь куни БМТ Хавфсизлик Кенгаши йиғилишида иштирок этиш учун у ерга учиб кетган. “El Tiempo”нинг бир қатор манбаларига кўра, айнан мана шу чора Петронинг фойдасига хизмат қилиши мумкин – лавозимдан четлатилиш уни президентлик пости билан боғлиқ чекловлардан озод қилади ва ўз номзоди – Сепеда учун очиқчасига ташвиқот олиб боришига имкон беради.

Петронинг хатти-ҳаракатлари сайлов кампанияси даврида давлат хизматчиларининг бетарафлик принципини бузиши деб баҳоланган. Бу Колумбия интизом ҳуқуқидаги энг оғир қоидабузарликлардан бири эканлиги таъкидланмоқда. 

Эслатиб ўтамиз, аввалроқ Густаво Петро АҚШ Президенти Дональд Трампни мамлакатдаги президентлик сайловларига аралашишда айблаган эди.