FIFA эронликлар учун ажратилган чипталарни бекор қилди

FIFA Эрон мухлислари учун 2026 йилги Жаҳон чемпионатининг учта ўйинига ажратилган чипта квотасини бекор қилди. Бу ҳақда Эрон футбол федерацияси (FFIRI) баёнотига таяниб, “Associated Press” хабар берди. 

Қоидаларга кўра, мундиалда иштирок этадиган 48 та терма жамоанинг ҳар бир федерацияси стадионлар сиғимининг 8 фоизига тенг чипталарни олиш ва ўз мухлислари ўртасида тақсимлаш ҳуқуқига эга. Бу ҳар бир ўйин учун бир неча минг чиптани ташкил этади.

Бироқ мусобақа бошланишига саноқли кунлар қолган бир пайтда Эрон футбол федерацияси энди ўз мухлисларига мазкур квота бўйича чипталарни тақдим эта олмаслигини маълум қилди. FIFA ҳозирча FFIRI баёноти юзасидан расмий изоҳ бермаган.

Маълум қилинишича, ўтган йилдан буён Эрон фуқаролари АҚШ томонидан жорий этилган саёҳат чекловларига дуч келмоқда. Бу эса уларнинг Жаҳон чемпионати учун виза олиш имкониятини сезиларли даражада камайтирган.

2025 йил декабрь ойида бўлиб ўтган қуръа ташлаш маросимидан буён Эрон учун ажратилган чипталарнинг қанча қисми АҚШ ва бошқа мамлакатларда яшовчи эронлик диаспора вакилларига сотилгани маълум эмас.

Маълумот учун, Эрон миллий терма жамоаси Жаҳон чемпионати гуруҳ босқичида Янги Зеландия, Бельгия ва Миср терма жамоалари билан биргаликда “Г” гуруҳидан жой олган. Эронликларнинг гуруҳ босқичидаги барча учрашувлар АҚШда ўтказилади.