Исроилнинг Ғазога кетаётган флотилияга қилган ҳужумини оқлаб бўлмайди – Марк Карни

Канада Бош вазири Марк Карни Ғазога гуманитар ёрдам олиб бораётган флотилия иштирокчиларига нисбатан Исроил томонидан қилинган муносабатни “даҳшатли” деб атади. Бу ҳақда у кеча, 25 май куни берган баёнотида сўз очган.

Баёнотда Марк Карни ва Исроил Президенти Исаак Ҳерцог ўртасидаги телефон мулоқоти ҳақида маълумот берилган. Суҳбат давомида Карни флотилия иштирокчиларига нисбатан қилинган муносабат юзасидан мустақил тергов ўтказишни талаб қилган. 
Аввалроқ, Исроил Миллий хавфсизлик вазири Итамар Бен-Гвир тарқатган видеода фаоллар қўллари боғланган ҳолда, ерга тиз чўктирилгани ва масхара қилингани акс этган эди.

“Бош вазир Ғазога йўл олган флотилия бортидаги тинч аҳолига, жумладан Канада фуқароларига нисбатан қилинган дахшатли муносабат қабул қилиб бўлмас эканини таъкидлади”, дейилган баёнотда.

Карни, шунингдек, босиб олинган Ғарбий Соҳилда Исроил аҳоли пунктларини кенгайтиришга Канаданинг қарши эканини ҳамда яҳудий кўчманчилар томонидан фаластинликларга қарши зўравонликларни қоралашини яна бир бор билдирган.

Бен-Гвир тарқатган видео халқаро миқёсда кескин танқидларга сабаб бўлганди. Қатор давлатлар расмий баёнотлар билан чиққанди. Шулардан айримлари амалий чоралар ҳам кўрди. Масалан, Франция 23 май куни Бен-Гвирнинг мамлакатга киришини тақиқлаган ва бу қарорни унинг “Global Sumud Flotilla” иштирокчиларига нисбатан ҳаракатлари билан изоҳлаган эди. 
Польша ҳам Бен-Гвирга нисбатан беш йиллик кириш тақиқини жорий этиш ташаббуси билан чиққан. Франция ва Италия раҳбарлари эса, Европа Иттифоқини Исроил вазирига қарши санкциялар киритишга чақирган. Шунга қарамай, Исроил одатда жиддий босим ёки амалий оқибатларга кам дуч келмоқда. 

Инсон ҳуқуқлари ташкилотлари Исроил қамоқхоналарида қийноқлар ва ғайриинсоний шароитлар мавжудлиги ҳақида далиллар келтирган. “Amnesty International” ва “B’Tselem” каби ташкилотлар Исроилни фаластинликларга нисбатан апартеид тизимини қўллашда айблаган. 

“Global Sumud Flotilla” акцияси Исроилнинг Ғазодаги ҳаракатларига қарши ўтказилган. Қайд этилишича, 2023 йил октябридан буён урушда 75 мингдан ортиқ фаластинлик ҳалок бўлган, тирик қолганлар эса, очлик ва мажбурий кўчиш муаммосига дуч келган. Фаоллар бир неча бор Ғазога гуманитар ёрдам етказишга уринган, аммо уларнинг кемалари Исроил кучлари томонидан тўхтатилган.

Эслатиб ўтамиз, аввалроқ Исроил армияси Ғазога гуманитар ёрдам етказишни мақсад қилган “Global Sumud” флотилиясига ҳужум уюштириб, 170 нафардан ортиқ фаолни қўлга олган эди.