АҚШ Эронга бешта шарт қўйди

АҚШ Эронга тинчлик музокараларини қайта бошлаш учун бажарилиши лозим бўлган 5 та талабдан иборат рўйхатни топширди. Бу ҳақда “Fars News Agency” хабар берди.

Агентликнинг маълумотига кўра, АҚШ қуйидаги шартларни илгари сурган:

• Вашингтон уруш оқибатида етказилган зарар учун Эронга ҳеч қандай компенсация тўламайди;
• Эрон 400 килограмм бойитилган уранни мамлакатдан олиб чиқиб, АҚШга топшириши керак;
• Мамлакатда фақат битта ишлаётган ядровий мажмуа қолдирилиши лозим;
• АҚШ музлатилган Эрон активларининг кўпи билан 25 фоизини озод қилади.

Барча фронтларда, жумладан Ливандаги урушни тўхтатиш фақат музокаралар жараёнида амалга оширилиши мумкин.

Нашр келтирган экспертлар фикрича, АҚШ бу орқали муаммони ҳал қилиш эмас, балки уруш вақтида эриша олмаган мақсадларини музокара орқали амалга оширишга уринмоқда.

Бундан аввал Эрон ҳам музокараларни қайта тиклаш учун АҚШга 5 та талабни бажаришини илгари сурган эди. Улар қуйидагилардан иборат:

• барча фронтларда, айниқса Ливанда урушни тўхтатиш;
• Эронга қарши санкцияларни бекор қилиш;
• музлатилган Эрон активларини озод қилиш;
• уруш оқибатидаги зарарни қоплаш;
• Ҳормуз бўғози устидан Эрон суверенитетини тан олиш.

АҚШ Президенти Дональд Трамп эса, Эроннинг таклифларини “қабул қилиб бўлмайдиган” деб атаган.

Ҳозирча АҚШ ва Эрон ўртасида апрель ойи бошида тузилган вақтинчалик ўт очишни тўхтатиш режими амал қилмоқда. Бироқ томонлар вақти-вақти билан бир-бирига зарбалар беришда давом этяпти.

Эслатиб ўтамиз, АҚШ ва Исроил келгуси ҳафтадаёқ Эронга қарши апрель ойида сулҳ эълон қилинганидан кейин тўхтатиб қўйилган ҳарбий операцияни қайта бошлашга фаол тайёргарлик кўраётгани ҳақида хабар берилганди.