Бразилияда сиёсий баҳсни Dota орқали ҳал қилиш таклиф этилди

Бразилиялик депутат Ким Катагири оммавий баҳсни Dota 2 ўйини орқали ҳал қилиш таклифи сабабли ғайриоддий сиёсий-киберспорт можароси марказида қолди. Парламент аъзоси ўзининг X ижтимоий тармоғидаги саҳифасида, агар ютқазса, депутатлик мандатидан воз кечишга тайёрлигини билдирди.

Маълум бўлишича, можаро Рио-де-Жанейро ўйинлар ва киберспорт бўлими раҳбари Чанди Тейшейранинг танқидидан кейин бошланган. Тейшейра Катагирини сайловолди кампанияси даврида видеоўйинлар ва киберспортга бўлган “намойишкорона” қизиқиши орқали ёшлар овозини олишга уринишда айблаган.
Тейшейранинг фикрича, сиёсатчилар ўйин маданиятидан сиёсий маркетинг воситаси сифатида фойдаланмаслиги керак. У ўз хабарида геймерлар ҳамжамиятига сайловчилар орасида машҳур бўлиш учун киберспорт клублари атрибутикасини кийиб, атайлаб Dota 2 ўйнайдиган номзодлар эмас, балки “ўз вакиллари” кераклигини таъкидлаган.

Депутатни ҳимоя қилиб Team Nemesis мураббийи Филипе Астини чиққан. У Катагири анчадан бери Dota 2 ишқибози эканини ва мунтазам равишда ўйин трансляцияларини (стрим) олиб боришини таъкидлаган. Унинг сўзларига кўра, агар сиёсатчининг мақсади фақатгина сайловчилар эътиборини тортиш бўлганида, у эҳтимол оммабоп бўлган League of Legends ўйинини танлаган бўларди.

Танқидларга жавобан Катагири икки жамоа ўртасида тўлиқ Dota 2 матчи ўтказишни таклиф қилган, бунда жамоа сардорлари можаро иштирокчиларининг ўзлари бўлиши керак. Депутат мағлубиятга учраган тақдирда парламентдаги мандатидан воз кечишга тайёрлигини маълум қилган.

Тейшейра бу таклифни тўғридан тўғри рад этмаган, бироқ жавоб тариқасида рақибини “6-1” иш графигини қўллаб-қувватлашда айблаган ва бундай ҳолатда рақибига матч учун жамоа йиғиш қийин бўлишига шаъма қилган.