Италиянинг Ўзбекистондаги собиқ элчиси Римда қўлга олинди

Италиянинг Тошкентдаги элчиси бўлган 56 ёшли Пападиа де Боттини ди СантʼАньезе ҳамда унинг ҳамкори, 53 ёшли россиялик аёл Татьяна Тараканова Рим прокуратураси томонидан ноқонуний миграцияга кўмаклашиш ва мансаб ваколатларини суиистеъмол қилишда гумон қилинмоқда. Бу ҳақда “La Repubblica” хабар берди.

Тергов материалларига кўра, Пападиа 2024 йил 2 декабрда Ўзбекистондаги Италия элчихонаси раҳбари сифатида иш бошлаганидан кейин виза бўлими фаолиятини шахсан ўз назоратига олган. Кўп ўтмай, у Москвада Италия консуллигида ўзи билан бирга ишлаган Татьяна Тараковани ҳам виза бўлимига жалб қилган.

Италия молиявий полицияси маълумотига кўра, улар россиялик фуқароларга Шенген ҳудудига кириш учун узоқ муддатли туристик визаларни 1 йилдан 3 йилгача қонун талабларисиз бериб келган. Бунинг учун эса ҳар бир одамдан 4 минг евродан 16 минг еврогача пул олинган. Расмий тарифлар эса аслида 45–60 евро атрофида бўлган.

Терговчиларнинг айтишича, схема Москвадаги Happy Travel, Visa4you ва Park Lane туристик агентликлари орқали ишлаган. Уларнинг барчаси бир хил манзилда жойлашган бўлган.

Ҳозиргача камида 95 нафар россиялик Италияга керакли талабларсиз киргани аниқланган. Айримлар Ўзбекистонда яшамаган, баъзиларнинг ҳужжатларидаги имзолар паспортдаги имзоларга тўғри келмаган, яна баъзилари эса консулликка умуман келмаган ҳолда виза олган.

Тергов маълумотларига кўра, баъзи “махсус” аризалар ҳатто Telegram орқали юборилган. Улар “рўйхатдан ташқари” деб аталган.

Бу иш 2025 йил 23 июлда Италия Ташқи ишлар вазирлиги инспекцияси Тошкентдаги элчихонада текширув ўтказганидан кейин очилган. Инспекторлар текширган 92 та виза ишининг 81 тасида ариза берган россияликларнинг элчихонага киргани ҳақида қайд йўқлиги аниқланган.

Шунингдек, Visa Concord Travel агентлиги 2025 йил январь-июнь ойлари орасида Тараканованинг Болгариядаги ҳисоб рақамига 23,6 минг евро ўтказгани маълум бўлган. Бу тўловлар ҳужжатларда “қарз” сифатида кўрсатилган.

Тергов вақтида элчихона ходимларидан бири Марко Эспозито Пападиа билан бўлган суҳбатни ёзиб олган. Суҳбатда у элчидан: “Бу ишни нега қилдингиз? Пул учунми?” деб сўрайди. Пападиа эса: “Менга пул керак эди”, деб жавоб берган.Кейинроқ Пападиа бу гаплар босим остида айтилганини, инспекция вақтида қаттиқ хавотирда бўлганини айтган.

Ҳозирда Италия прокуратураси 400 га яқин виза ишини текширмоқда. Шунингдек, Пападианинг тахминан 3 миллион евролик мол-мулки ҳам ўрганилмоқда. У бу бойлик мерос орқали келганини даъво қилган.