Юлдуз яна портлатди. Исроил сукутда. Эрон эса Усмоновани олқишлаяпти

Яҳудийларга қарши чиқишлари, “Фаластин озод бўлсин” деган баёнотлари ва шунинг ортидан АҚШдаги концерти бекор қилингани билан муҳокамалар марказига чиққан Юлдуз Усмоновага Эрон элчихонаси томонидан совға юборилди. Ижтимоий тармоқларда тарқалган видеода элчихона вакили хонандага совғани топшираётгани акс этган.

Видеода айтилишича, Эрон Ислом Республикасининг Ўзбекистондаги элчиси Муҳаммадали Искандарий ҳамда элчихонанинг маданий алоқалар бўйича маслаҳатчиси Ҳасан Сафархоний Юлдуз Усмоновага Эрон, Фаластин ва Ливанда ҳалок бўлаётган болалар ва тинч аҳоли томонида тургани учун қўл меҳнати билан тайёрланган совғани тақдим этган.

Бугун Юлдуз Усмонова яна кун тартибида. Бу сафар муҳокамалар унинг қўшиқлари эмас, балки АҚШдаги концертининг бекор қилиниши, исроилликлар норозилиги ва хонанданинг яҳудийлар ҳақидаги баёнотлари атрофида кечмоқда. Қизиғи, Усмонова билан яҳудий жамоалари ўртасидаги зиддият илк марта эмас.

Жорий йилнинг 9 май куни АҚШда Ўзбекистон халқ артисти Юлдуз Усмонованинг концерти бўлиб ўтиши керак эди. Дастур Нью-Йорк шаҳридаги “Ocean” театрида режалаштирилган, чипталар ҳам сотиб бўлинган эди. Бироқ тез орада хонандага қарши кампания бошланди. Маҳаллий сиёсатчилар – Нассау округи раҳбари ва штат губернаторлигига номзод Брюс Блейкман, Нью-Йорк штати Ассамблеяси аъзолари Майкл Новахов ва Алек Брук-Красний Усмоновани антисемитик руҳдаги баёнотларда айблаб чиқди.

“Яҳудий халқига зарар етказишга чақирган ижрочи АҚШга келиб, дунёдаги энг йирик яҳудий жамоаларидан бири яшайдиган ҳудуд марказида концерт беришига йўл қўйиб бўлмайди”, деган Брюс Блейкман.

Норозилик билдирган фаоллар сўзларига кўра, Усмоновага оммавий равишда баёнотларини рад этиш ва кечирим сўраш таклиф қилинган, аммо у бундан бош тортган. Шунингдек, АҚШ Давлат котиби Marco Rubio номига хонанданинг визасини бекор қилиш талаби билан мурожаат ҳам юборилган.

“Кейинги чораларни кўришдан олдин, менинг идорам у билан боғланиб, баёнотларини қайтариб олиши ва оммавий кечирим сўраши учун имконият берди. У эса рад этди. Энди биз чора кўряпмиз”, деган Блейкман.

Аслида бу можаро 2021 йилдаги баёнотлардан бошланган. Ўшанда ҳайит байрами арафасида Юлдуз Усмонова Исроил-Фаластин можароси ҳақида фикр билдириб, Исроилни босқинчиликда айблаган ва Исроил маҳсулотларини бойкот қилишга чақирган эди.

Бу чиқишлар АҚШ ва Исроилдаги Бухоро яҳудийлари жамоасида кескин норозилик уйғотган. Улар хонанданинг сўзларини “антисемитик” дея баҳолаб, Исроил халқидан кечирим сўрашини талаб қилган. Юлдуз Усмонова эса бу талабларга жавоб қайтарган.

“Агар тўйларингизда қўшиқ айтган бўлсам, бу сизларга менинг динимни ҳақорат қилиш ҳуқуқини бермайди. Сиздан пул олган бўлсам, Аллоҳ берган санъатим учун олганман”, деган у.

Маълум бўлишича, бу биринчи ҳолат эмас. Усмонованинг 2024 йил 14 сентябрь кунига белгиланган Нью-Йоркдаги концерти ҳам Америкадаги яҳудий диаспораси норозилиги ортидан бекор қилинган эди.

Бу йилги воқеаларга келсак, яҳудий жамоаларининг янги кампаниясидан кейин Юлдуз Усмонова Instagram саҳифасида кескин муносабат билдирди ва ҳеч қачон кечирим сўрамаслигини айтди.

“Агар сиз яҳудийлар ва сионистлар мени кечирим сўрайди деб ўйласангиз, қаттиқ адашасиз. Мен ўз қарашларимда қатъийман. Мен зўравонликка қаршиман. Ва ҳар доим ‘Фаластин озод бўлсин’ деб айтаман”, деган хонанда.

5 май куни, концертга тўрт кун қолганида, “Ocean” театри Facebook орқали концерт бекор қилинганини расман маълум қилди.

“9 май кунига белгиланган Юлдуз Усмонованинг концерти бекор қилинди. Чипта пуллари харид қилинган жойларда қайтариб берилади”, дейилган эълонда.

Шундан кейин Усмонова яна баёнот билан чиқиб, АҚШ ҳудудида туриб бошқа давлат фуқаросининг концертини тўхтатишга уринишларни танқид қилди.

“Америка Исроил эмас. Шунинг учун ўзингизни бу ерда хўжайин деб ўйламанг. Сиз бутун дунёни ўзингизга қарши қилиб қўйдингиз. Сиздан ҳеч ким кечирим сўрамайди. Чунки сиз босқинчисиз”, деган у.

Юлдуз Усмонова бу воқеалар унга “фақат обрў келтириши”ни ҳам таъкидлади.