“Фаластин озод бўлсин”. Юлдуз Усмонованинг АҚШдаги концерти бекор қилинди (видео)

АҚШда Ўзбекистон халқ артисти Юлдуз Усмонованинг концертига қарши кампания бошлангани фонида Oceana театрида жорий йилнинг 9 май куни ўтказилиши режалаштирилган концерт дастури бекор қилинди. Бу ҳақда театрнинг Facebook’даги саҳифасида эълон қилинди.

“9 май кунига белгиланган Юлдуз Усмонованинг концерти бекор қилинди. Ҳурматли мижозлар, чипта пуллари чипта сотиб олинган жойларда қайтариб берилади. Келтирилган ноқулайликлар учун узр сўраймиз”, дейилади эълонда.

Хонанда Юлдуз Усмонова ушбу воқеалардан сўнг Instagram’даги саҳифаларида мурожаат билан чиқди.

“Ватандошларимиз, ўзбеклар, қирғизлар ва менинг мухлисларим, концертга чипта сотиб олганлардан миннатдорман. Барча чипталар сотилди, яъни “sold out”. Бу мени жуда қувонтиради. Лекин айтишадику, инсоннинг тақдири олдиндан ёзилган бўлади, деб. Бироқ сиз яҳудийлар ва сионистлар, мени кечирим сўрайди деб ўйласангиз, адашяпсиз. Мен ўз фикрларимда қатъийман”, деган у.

Шунингдек, санъаткор мурожаатида Фаластин озод бўлиши, Исроил дунё эгаси эмаслиги ҳақида сўз юритган.

“Мен зулмга қаршиман. Фаластин озод бўлсин. Бу уларнинг ери. Сиз қадимий халқ бўлишингиз мумкин, лекин Исроил – янги давлат. АҚШ эса, Исроил эмас. Шунинг учун ўзингизни ҳамма нарсанинг эгасидек тутманг. Дунёнинг ўз эгаси бор ва у сизлар эмассиз. Балки банкларни бошқарарсиз, бошқа нарсаларни ҳам бошқарарсиз, лекин дунё аста-секин кўзини очяпти. Бироз кутинглар. Сизлар бутун дунёни ўзингизга қарши қилиб қўйдингиз. Худди шундай бизни ҳам қарши қилмоқчисизлар. Яна бир бор ўзингизни қандай эканингизни кўрсатдингиз. Чунки сизлар зулм қилувчиларсиз ва ҳеч ким сизларнинг зулмингиз остида яшамайди”, деган Усмонова.

Шунингдек, Юлдуз Усмонова бу воқеалар унга фақат обрў келтиришини айтган.

“Сиздан ҳеч ким, ҳеч қачон узр сўрамайди. Биз эса, ўзини ҳурмат қиладиган қадимий халқмиз. Алҳамдулиллаҳ, биз мусулмонмиз. Динимизни, миллатимизни, ўзимизга тегишли бўлган қадимий юртимизни ҳурмат қиламиз. Қанчалик норозилик билдирманг, бу менга фақат обрў қўшади. Концертларда, албатта, кўришамиз, бу сафар бўлмаса, кейинги сафар. Мен инсоният учун куйлайман. Адолат эса, барибир ғалаба қилади”, дея сўзини якунлаган у.

Эслатиб ўтамиз, аввалроқ Юлдуз Усмонованинг концертига қарши кампания ўтказилгани ҳақида хабар берилган эди. Унда маҳаллий сиёсатчилар, жумладан, Нассау округи раҳбари ва штат губернаторлигига номзод Брюс Блейкман, шунингдек, Нью-Йорк штати Ассамблеяси аъзолари Майкл Новахов ва Алек Брук-Красний танқид билан чиқиш қилган. Кампания ташаббускорлари хонандани антисемитик руҳдаги баёнотларда айбламоқда. Уларнинг сўзларига кўра, Юлдуз Усмоновага ушбу баёнотларни оммавий равишда рад этиш ва узр сўраш таклиф қилинган, бироқ у буни рад этган. Шунингдек, АҚШ Давлат котиби Марко Рубиога санъаткорга берилган визани бекор қилиш тўғрисида мурожаат юборилган.