Ким Чен Ин ёшларни Украинадаги урушга тайёрланишга чақирди

Шимолий Корея етакчиси Ким Чен Ин съезд давомида ёшларни Корея Меҳнат партияси вазифаларини бажаришда асосий куч деб атади ва уларни Украинадаги урушда Россия томонида туриб жанг қилишга тарғиб қилди. Бу ҳақда “Reuters” хабар берди.

Маълум бўлишича, Пхеньянда Социалистик ватанпарвар ёшлар лигасининг ўн биринчи съезди бўлиб ўтган. Шимолий Кореяда бундай тадбир ҳар беш йилда бир марта 14 ёшдан 30 ёшгача бўлган йигит-қизлар учун ўтказилади. Тадбир шу ҳафта оммавий митинглар, машъалали юришлар ва тантанали концерт билан якунланган.

Ким Чен Ин ўз нутқида ёшлар ўртасида “ташкилотчилик ва мафкуравий интизомни кучайтириш”га чақирган ҳамда ёшлар лигаси ҳукмрон партия қарорларини ижро этишда муҳим куч эканини таъкидлаган.

“Reuters” ёзишича, Меҳнат партияси ёшларнинг содиқлигини Пхеньяннинг Украинадаги урушда иштирок этиши билан тўғридан тўғри боғлаган. Конгресс иштирокчиларига йўлланган мактубда хориждаги операцияларга юборилган ёш аскарлар мамлакат шарафини ҳимоя қилиш учун “бомба ва алангага айлангани” айтилган.

Жанубий Корея, Украина ва Ғарб расмийларининг маълумотларига кўра, КХДР Курск вилоятидаги Россия кучларини қўллаб-қувватлаш учун 14 мингга яқин ҳарбий юборган. Шунингдек, уларнинг 6 минг нафардан ортиғи ҳалок бўлган бўлиши мумкинлиги даъво қилинмоқда.

Ўтган ойда Пхеньянда ҳалок бўлган аскарлар шарафига ёдгорлик очилди. Мафкуравий назорат кучаяётган бир пайтда, КХДР расмийлари хорижий маданият, хусусан, Жанубий Корея мусиқаси, фильмлари ва сленглари таъсирини ҳам қаттиқ чекламоқда.

Эслатиб ўтамиз, КХДР ҳарбийлари Россияга юборилаётгани ҳақидаги илк хабарлар 2024 йил октябр ойида пайдо бўлган эди. Жанубий Корея разведкаси маълумотларига кўра, ўшанда 1500 га яқин шимолий кореялик аскарнинг кўчирилиши қайд этилган ва кейинчалик улар Курск вилоятидаги жанговар ҳаракатларга жалб қилинган.

Шунингдек, шимолий кореялик ёлланма аскарлар Россиянинг Курск вилояти ҳудудидан туриб дронларни бошқариш ва Украина позицияларига бериладиган зарбаларни йўналтириш орқали Суми вилоятида русларга ёрдам бераётгани хабар қилинган.

Яқинда КХДР етакчиси Ким Чен Ин ўз ҳарбийларини Украинага қарши урушда “ўзини портлатиш” жасорати учун оммавий равишда мақтаган эди.

Британия разведкаси маълумотларига кўра, КХДР Курск вилоятида Украина қўшинларига қарши жангларда 6 минг кишини йўқотган. Бу Шимолий Корея ушбу минтақага юборган тахминан 11 минг ҳарбийнинг ярмидан кўпини ташкил этади.