Эркак хотирасини йўқотган рафиқасига иккинчи бор уйланди (видео)

Малайзияда бир эркак саккиз йил аввал хотирасини йўқотган рафиқаси учун қайтадан тўй маросимини ўтказди. Бу ҳақда “Mothership” хабар берди.

Эркакнинг сўзларига кўра, бир неча йил олдин рафиқаси аварияга учраб, кома ҳолатига тушиб қолган. У ўзига келганида эри ва фарзандларини танимаган, шунингдек, кўплаб оддий кўникмаларни ҳам унутиб қўйган. Ўшандан бери у тўлиқ эрининг кўмагига таяниб яшайди.

Малайзиялик бу киши ўша даврни ҳаётидаги энг оғир пайт бўлганини, айниқса, фарзандлари ҳали жуда кичик бўлгани сабабли қийналганини сўзлаб берган. Шунга қарамай, у оиласи учун кучли бўлишга ва рафиқаси билан янги хотиралар яратиш умидида унга ғамхўрлик қилишда давом этишга қарор қилган.

Қайта ўтказилган тўй маросими фотограф ва фарзандлар ёрдамида камтарона ташкил этилган. Жуфтлик бир хил анъанавий либослар кийган. Эркак аёлини эҳтиёткорлик билан уйга бошлаб кирган, у ерда эса гулбарг сочаётган фарзандлари уларни кутиб олган. Маросим учун эркак асл никоҳ узукларини тайёрлаб қўйган. Кўзларида ёш билан аёл эрига шунча йил давомида кўрсатган қўллаб-қувватлови учун миннатдорлик билдирган.