Яҳудийлар яна Юлдуз Усмонованинг Нью-Йоркдаги концертини бекор қилдирмоқчи (видео)

АҚШда Ўзбекистон халқ артисти Юлдуз Усмонованинг концертига қарши кампания бошланди. Бу ҳақда “Brighton beach news” хабар берди.

Маҳаллий сиёсатчилар, жумладан, Нассау округи раҳбари ва штат губернаторлигига номзод Брюс Блейкман, шунингдек, Нью-Йорк штати Ассамблеяси аъзолари Майкл Новахов ва Алек Брук-Красний танқид билан чиқиш қилди.

Кампания ташаббускорлари хонандани антисемитик руҳдаги баёнотларда айбламоқда. Уларнинг сўзларига кўра, Юлдуз Усмоновага ушбу баёнотларни оммавий равишда рад этиш ва узр сўраш таклиф қилинган, бироқ у буни рад этган. Шунингдек, АҚШ Давлат котиби Марко Рубиога санъаткорга берилган визани бекор қилиш тўғрисида мурожаат юборилган.

Бугун, 4 май куни Нью-Йоркда концертни бекор қилиш ташаббусига бағишланган матбуот анжумани ўтказилиши режалаштирилган. Матбуот анжумани ташкилотчиларининг фикрича, Бруклиннинг яҳудийлар яшайдиган туманида бундай концертнинг ўтказилиши, айниқса, Иккинчи жаҳон уруши хотираси билан боғлиқ сана арафасида мутлақо йўл қўйиб бўлмайдиган ҳолат.

Маълумот учун, 2014 йилда ҳам Нью-Йоркда Юлдуз Усмонованинг концерти бекор қилинган. Концертнинг бекор қилинишига таклифномада фақат Юлдуз Усмонованинг ўзигина кўрсатилгани сабаб бўлган. Ташкилотчилар хонанданинг АҚШга кириш визасини расмийлаштирган, бироқ унинг созандалари ҳақида унутиб қўйишган. Оқибатда созандалар ўз вақтида виза расмийлаштира олмаган ва концертни бекор қилишга тўғри келган.

Эслатиб ўтамиз, Юлдуз Усмонованинг АҚШнинг Нью-Йорк штатида 2024 йилнинг 14 сентябрь куни ўтказилиши керак бўлган анъанавий концерти ҳам Америкадаги яҳудий диаспорасининг норозилиги ортидан бекор қилинган эди. Ўзбекистон халқ артисти ўзининг Instagram саҳифасида Фаластин ва Исроил ўртасидаги можарога муносабат билдириб, Исроилни босқинчиликда айблаб, уни давлат деб ҳисобламаслигини айтган. Кейинроқ эса, у Исроил маҳсулотларини бойкот қилишга чақирган. Бу баёнот АҚШ ва Исроилдаги Бухоро яҳудийлари жамоасида ғазаб ва хавотир билан қаршиланди. Жамоа вакиллари Усмонова “антисемит оҳангидаги” чиқишлари учун Исроил халқидан кечирим сўраши кераклигини айтган.