Трамп Эрондаги намойишчиларига қурол юборганини айтди

АҚШ Президенти Дональд Трамп Эронда намойишчиларни қуроллантиришга уриниш ҳақида маълумот ошкор қилди. Бу ҳақда у журналистларга берган интервьюсида сўз очди.

Трампнинг айтишича, Қўшма Штатлар 2025 йил декабрь – 2026 йил январь ойларида Эронда оммавий норозиликлар пайтида Эрон намойишчиларига қурол етказишга уринган.

Унинг сўзларига кўра, қурол етказиб бериш Ироқ Курдистонидаги курд гуруҳлари орқали амалга оширилган, бироқ қуроллар охирги манзилга етиб бормаган.

“Биз уларга жуда кўп қурол юбордик. Биз уни курдлар орқали жўнатдик. Менимча, курдлар уни ўзларида олиб қолишган. Биз қуролни норозилик қатнашчиларига юбордик” деган Оқ уй раҳбари.

Қайд этиш жоиз, бу баёнот АҚШнинг суверен давлат ишларига бевосита аралашгани ва ҳатто қуролли қўзғолонни қўллаб-қувватлашга урингани сифатида талқин қилинади.

Шунингдек, бу ҳолат Эрон ҳукумати томонидан ҳам ўз манфаатлари учун ишлатилиши мумкинлиги айтилади, яъни Теҳрон намойишлар ташқи кучлар томонидан қўллаб-қувватланганини исботлаш сифатида кўрсатиши мумкин.

Трамп, шунингдек, қурол юклари Ироқ Курдистонидаги Сулаймония ҳудудида қолиб кетганидан норозилик билдирган.

У курдларга қарата огоҳлантириш берган.

“Мен жуда норози бўлдим. Қуролни ушлаб қолганлар катта нарх тўлайди”, деган Трамп.

Эслатиб ўтамиз, аввалроқ Эрон Ташқи ишлар вазири Аббос Ароқчи Қўшма Штатлар Эронга берилган зарбалар учун тахминан 100 миллиард доллар сарфлагани ҳақида айтганди.