Фаровонлик ҳақидаги тасаввуримиз энди узоққа бормайди – Мерц

Германия канцлери Фридрих Мерц немислар сўнгги 20 йилда фаровонлик муҳитига жуда ўрганиб қолганини, бироқ аввалгидек яхши яшаш даври тугаганини айтди. Бу ҳақда у “Spiegel” нашрига берган интервьюсида сўз очди.

“Аҳолининг катта қисми, ҳатто сиёсий доиралар ҳам ҳозир дунёда нима бўлаётганини тўлиқ англамаяпти. Илтимос, буни танқид деб қабул қилманг, лекин биз фаровонлик муҳитида жуда қулай яшаб қолдик. Мен сўнгги 20 йилда буни немисларга очиқ гапирётган илк канцлерман – фаровонлик ҳақидаги тасаввуримиз энди узоққа бормайди. Биз олдин қилганимиздан кўра кўпроқ иш қилишимиз ва ўзгаришлар киритишимиз керак”, дейди Мерц.

Канцлер вазиятни жуда мураккаб деб баҳолаб, аввалгидек яшаш энди имконсизлигини таъкидлаган. У айниқса, немислар жуда кўп ҳолларда касаллик варақаси олишини қайд этган.

“Наҳотки биз ҳақиқатан ҳам шунчалик касал миллат бўлсак? Европада ишдан қолиш бўйича энг юқори кўрсаткичлардан бирига эгамиз. Биз бунинг сабабларини аниқлаб, бу рақамларни камайтириш учун рағбатлар яратишимиз керак”, дейди у.

Шунингдек канцлер пенсия тизими, соғлиқни сақлаш ва солиқ тизимини ислоҳ қилиш зарурлигини таъкидлаган. Бундан ташқари, Мерц пенсия ёшини биологик ёшга эмас, балки иш стажига боғлаш мумкинлигини ҳам айтиб ўтган.

Эслатиб ўтамиз, аввалроқ Фридрих Мерц жаҳон тартиби “бузилаётганини”, Европа ва АҚШ ўртасидаги алоқалар ортиқ ишончли эмас эканини айтган эди.

Ойбек Рустамов