Кореяда ўзбек аёллари Нозима Ким учун намойиш ўтказди (видео)

Жорий йилнинг 26 апрель куни Жанубий Кореянинг Пхёнтхэк шаҳридаги полиция биноси қаршисида уйидан ўлик ҳолда топилган ўзбекистонлик Нозима Ким учун намойиш ўтказилди. Ижтимоий тармоқларда воқеа акс этган видео тарқалди.

Маълумотларга кўра, намойиш бир неча ўзбекистонлик аёллар томонидан 2 соат давомида ўтказилган. Намойишда Анора исмли аёл фаол иштирок этган.

“Марҳуманинг номига айтилаётган сўзлар Корея қонунчилигига тўғри келмайди. Унинг уйига кирганлар марҳуманинг қонуний турмуш ўртоғи эмас. Марҳуманинг уйига полиция ходимлари, суд экспертиза ходимларидан бошқа ҳеч кимга киришга рухсат берилмаган!” дейди намойиш вақтида Анора. 

Шунингдек, аёл уларнинг марҳумани қоралашга ҳеч қандай ҳуқуқи йўқлигини айтган. Тарқалган видеода намойишчиларга ҳужум қилишга уриниш кузатилган. Ҳужум қилган шахс полиция томонидан тўхтатиб қолинган.

Эслатиб ўтамиз, аввалроқ Кореяга ишлаш мақсадида кетган, бир нафар боланинг онаси бўлган сирдарёлик 26 ёшли аёл Нозима уйидан ўлик ҳолда топилганди. Ўзбекистон Ташқи ишлар вазирлиги матбуот хизмати Нозима ўз жонига қасд қилгани ҳақида баёнот берди. Олиб борилаётган тергов ишлари ҳақида аниқ маълумотларни тақдим этиш мақсадида марҳуманинг онаси Феруза Алимбекова Ўзбекистоннинг Кореядаги элчихонаси ҳамда мазкур давлат полицияси кўмагида Жанубий Кореяга таклиф этилган.

Алимбекова Ташқи ишлар вазирлиги берган баёнотдан норози эканлигини айтиб, ундаги тиббий экспертиза хулосасида қизининг ўлими сабаби ноаниқ экани ҳақида ёзилганини таъкидлаган.