“Шахсан маълумот беришни истадим“. Ароқчи Путин билан учрашди

Кеча, 27 апрель куни Россиянинг Санкт-Петербург шаҳрида Президент Владимир Путин Эрон ташқи ишлар вазири Аббос Ароқчи билан учрашув ўтказди. Бу ҳақда Кремль матбуот хизмати хабар берди.

Қайд этилишича, учрашувда Россия ташқи ишлар вазири Сергей Лавров, Президент ёрдамчиси Юрий Ушаков ҳамда Россия Қуролли кучлари Бош штаби Бош разведка бошқармаси бошлиғи ўринбосари Игорь Костюков иштирок этди.

Эрон томонидан эса, Россиядаги фавқулодда ва мухтор элчи Козим Жалолий ҳамда Эрон ташқи ишлар вазири ўринбосари Козим Гарибабади қатнашган.

Путин суҳбат бошида ўтган ҳафтада Эрон Олий раҳбаридан мактуб олганини, унга ўзининг чуқур миннатдорлигини билдирган. У шунингдек, Россия ҳам Эрон каби стратегик ҳамкорликни давом эттириш ниятида эканини айтган.

“Биз Эрон халқи ўз мустақиллиги ва суверенитети учун қандай жасорат ва матонат билан курашаётганини кўриб турибмиз. Албатта, умид қиламизки, айнан шу жасорат ва мустақилликка интилиш туфайли, Эрон халқи янги раҳбар бошчилигида бу мураккаб синов давридан ўтиб, тинчликка эришади.

Ўз навбатида, сизнинг манфаатларингизга, шунингдек минтақадаги барча халқлар манфаатларига мос келадиган тарзда тинчлик тезроқ қарор топиши учун қўлимиздан келган барча ишни қиламиз. Сиз бизнинг позициямизни яхши биласиз”, деган Россия Президенти.

Ароқчи эса, марҳум Эрон Олий раҳбарининг шаҳид бўлиши муносабати билан йўллаган таъзияси ҳамда янги раҳбар сайлангани муносабати билан йўллаган табриклари учун Путинга алоҳида миннатдорлик билдирган. У шунингдек Президент Масъуд Пезешкиённинг самимий тилакларини етказган.

“Улар, шунингдек, ушбу ташрифим давомида сизга шуни етказишимни сўрашди: Эрон–Россия муносабатлари биз учун энг юқори даражадаги стратегик ҳамкорликни англатади ва биз шу йўлда давом этамиз. Қандай воқеалар бўлишидан қатъи назар, бу алоқалар янада мустаҳкамланади”, деган Ароқчи.

Вазир қолаверса, Россияни оғир дамларда Эрон ёнида турган дўст мамлакат эканини таъкидлаган. Ароқчи уруш воқеаларидан кейин илк хорижий сафари доирасида Россияга келишга қарор қилганини ва Путинга юз берган барча жараёнлар ҳақида шахсан маълумот беришни истаганини билдирган.

“Сиз тўғри таъкидлаганингиздек, бутун дунёга аён бўлдики, Эрон халқи ўз қаршилиги ва жасорати билан АҚШнинг ҳужумлари ва агрессиясига бардош бера олди ва бу синов давридан ҳам ўтади. Шунингдек, Эроннинг Россия Федерацияси каби дўст ва иттифоқчилари борлиги ҳам исботланди — айниқса оғир дамларда улар Эроннинг ёнида туради. Биз Ислом Республикасини қўллаб-қувватлашдаги қатъий позициянгиз учун миннатдормиз”, дейди у.

Эслатиб ўтамиз, аввалроқ Россия Президенти Владимир Путин Эрон Президенти Масъуд Пезешкиён билан телефон орқали суҳбатлашди. Суҳбат давомида томонлар АҚШ ва Исроилнинг Эронга қарши ҳарбий ҳаракатларини муҳокама қилганди.