Ким Украинада ҳалок бўлган аскарлари шарафига музей очди (фоторепортаж)

Кеча, 27 апрель куни Пхеньянда Корея Халқ Демократик Республикаси раҳбари Ким Чен Ин иштирокида Украина ҳудудидаги жангларда ҳалок бўлган аскарлар хотираси учун музей очилди. Бу ҳақда Корея марказий телеграф агентлиги хабар берди.

Қайд этилишича, мемориал мажмуанинг очилиш маросимида Ким Чен Иннинг шахсан ўзи ҳамда Россиянинг бир неча юқори лавозимли амалдорлари, жумладан, Давлат думаси раиси Вячеслав Володин, Мудофаа вазири Андрей Белоусовлар иштирок этган.

Мемориал музейнинг очилиш маросими икки давлатнинг Курск чегара ҳудудини “Украина босқинидан ҳалос этиш операцияси” якунланганининг бир йиллиги муносабати билан ташкил этилган.

Маросимда Ким Чен Ин очилиш нутқини сўзлаб, бир аскарнинг дафн маросимида иштирок этган. Ким аскасрнинг қабри устига рамзий тарзда тупроқ сепган ва бошқа аскарларнинг оммавий қабрига гул қўйган.

У ўз нутқида урушда ҳалок бўлган Шимолий Корея аскарлари Корея халқининг қаҳрамонлик рамзи бўлиб қолишини айтган. Шунингдек, Ким Россия делегациясига қарата КХДР бундан кейин ҳам Россиянинг Украина ҳудудида амалга ошираётган харбий операцияларини қўллаб қувватлашини билдирган. Бундан ташқари, у АҚШни харбий операциялар давомида авантюризм ва “гегемонлик фитнаси”да айблаган.

Маросимда Россия делегациясига раҳбарлик қилган Вячеслав Володин эса Россия Президенти Владимир Путиннинг Ким Чен Инга йўллаган мактубини ўқиб берган. У ўз нутқи давомида очилаётган янги музей КХДР-Россия дўстлигининг абадий рамзи бўлиб қолишини ва ўзаро стратегик шерикликни янада мустаҳкамлашини таъкидлаган. 

“Абадий дўстлигимизнинг рамзи бўлиб қолажак ушбу ёдгорлик бундан кейинги ҳар томонлама стратегик ва минтақавий ҳамкорлигимизни ривожлантиришига ишонаман. Москва Пхеньян билан 2027-2031 йилларга мўлжалланган ҳарбий ҳамкорлик режасини имзолашга тайёр”, дейди Россия Давлат думаси раиси.

Тадбир якунида Ким Россия делегацияси аъзолари билан “Фахрий меҳмонлар китоби”га имзо чеккан ва ўз тилакларини ёзиб қолдирган.

Маълумот ўрнида, Жанубий Корея разведкасининг хисоб-китобларига кўра, Шимолий Корея Курск вилоятида Россия номидан жанг қилиш учун 15 мингга яқин аскарини юборган ва улардан 2 мингга яқини ҳалок бўлган. Расмий Москва ва Пхеньян эса ҳеч қандай рақамларни ошкор қилмаган.

Эслатиб ўтамиз, 2025 йилнинг октябрь ойида Шимолий Корея Украинага қарши урушда ҳалок бўлган ўз аскарлари хотирасига бағишланган ушбу ёдгорликни қуришни бошлагани ҳақида хабар берилган эди.

Ҳожиакбар Муҳаммаджонов