Туркия Ҳормузни миналардан тозалашда иштирок этиши мумкин

Туркия Ташқи ишлар вазири Ҳоқон Фидан АҚШ ва Эрон ўртасида тинчлик келишуви тузилса, Анқара Ҳормуз бўғозида миналарни тозалаш ишларида иштирок этиши мумкинлигини маълум қилди. Бу ҳақда у бугун, 25 апрель куни Буюк Британияга расмий ташрифи доирасида ОАВга берган баёнотида сўз юритди.

У Оксфорд университетидаги тадбирдан сўнг журналистлар билан суҳбатда Туркия можаро тугагандан кейинги вазиятда миналарни тозалаш каби техник ва инсонпарварлик ишларига қарши эмаслигини таъкидлаган.

“Айтайлик, Эрон ва америкаликлар ўзаро келишувга эришди, натижада тинчлик ўрнатилди. У ерга коалиция бориб, техник ишларни амалга оширади ва миналарни тозалайди. Бунда ҳеч қандай муаммо йўқ. Миллий мудофаа вазирлигимизга Президентимиз томонидан тегишли топшириқ берилган. Бироқ, агар қайта бошланиши мумкин бўлган урушда бизнинг ўз сезгир жиҳатларимиз бор ва бундай вазиятда биз бошқача позицияда бўламиз”, деган Фидан.

Шунингдек, у Ҳормуз бўғози бўйича икки эҳтимолий ҳолат ҳақида маълумот берган. Биринчиси – музокаралар орқали келишувга эришилиб, денгиз йўллари ҳеч қандай чеклов ва қўшимча тўловларсиз эркин ҳаракат учун очиқ бўлиб қолади. Иккинчиси – агар музокаралар натижа бермай, уруш давом этса ёки янги муаммолар юзага келса, унда бўғоздаги муаммоли ҳудудларни қандай ҳал қилиш масаласи кун тартибига чиқади.

“Бундай вазиятда Ҳормуз бўғозидаги муаммоли ҳудудларни аниқлаш деган тушунча пайдо бўлади. Бу масаланинг баъзи жиҳатлари бизнинг ташқи сиёсатимизга мос келади, баъзилари эса мос келмайди. Президентимиз бу борада аниқ позицияга эга”, дейди у.

Эслатиб ўтамиз, аввалроқ АҚШнинг махсус вакиллари Стив Уиткофф ва Жаред Кушнер жорий йилнинг 27 апрель куни Покистоннинг Исломобод шаҳрида Эрон Ташқи ишлар вазири Аббос Ароқчи билан учрашиши мумкинлиги хабар қилинганди.