Россиялик бойлар Янги Зеландиядан бункерлар сотиб олишни бошлади

Россия Президенти Владимир Путин Валдайдаги қароргоҳини Украина дронлари ва ракеталаридан ҳимоя қилиш учун қўшимча ҳаво ҳужумидан мудофаа тизимлари билан ўраб олаётган бир пайтда, бошқа бадавлат россияликлар Янги Зеландиядаги ерости бункерлари бўлган уйларга миллионлаб рубль сармоя киритмоқда. Бу ҳақда маҳаллий риелторлик агентликларига таяниб, “Shot” хабар берди.

Маълумотларга кўра, россиялик тадбиркорлар “Учинчи жаҳон уруши эҳтимоли” ва Эронда давом этаётган уруш фонида Янги Зеландияда талаб уч баробар ортиб кетган кўчмас мулкларни сотиб олмоқда. Бундай тураржойларнинг нархи 23 миллиондан 200 миллион рублгача ўзгариб туради.

Энг арзон вариант – портлашга чидамли, газ ўтказмайдиган люк ва сув ўтказмайдиган композит конструкцияга эга кичик хона кўринишидаги бункер. Унга ҳавони фильтрлаш тизимлари (кимёвий, биологик, радиологик ва бошқалар), шунингдек, олов ва учқунлар тарқалишига тўсқинлик қилувчи “портлашга чидамли фитинглар” ўрнатилиши мумкин. Кейинги нарх сегменти – яшаш, техник қисмлар, ошхона ва бошқа бўлинмалардан иборат тўлиқ ерости квартиралари. Бундай ҳимояланган уйларнинг илғор вариантларида кўп болали оилалар ва одамлар гуруҳи узоқ вақт давомида яшаши мумкин.

Риелторларнинг сўзларига кўра, ерости бункерлари бўлган коттежлар фақат “элита мижозларга текширувдан сўнг” кўрсатилади. Шунингдек, тайёр уйга қўшимча равишда яширин жой қуриб бериш варианти ҳам мавжуд бўлиб, бунинг учун 4 миллиондан 40 миллион рублгача пул тўлашга тўғри келади.

Одатда бадавлат россияликлар Окленд, Веллингтон ва Крайстчерч каби рус тилли жамоалар мавжуд бўлган Янги Зеландия шаҳарларидан ер участкаларини сотиб олади, сўнгра уларда майдони тахминан 100 квадрат метр бўлган бункерли уйлар қуради.

Эслатиб ўтамиз, аввалроқ Meta компанияси бош директори Марк Цукерберг АҚШнинг Майами штатидан 170 миллион долларга ҳашаматли вилла харид қилган эди.