“Силжиш бор”. Оқ уй Эрон билан музокаралар ҳақида баёнот берди

Оқ уй матбуот котиби Кэролайн Левитт Қўшма Штатлар ва Эрон мулоқотида илгарилаш кузатилаётганини айтди. Бу ҳақда у кеча, 24 апрель куни бўлиб ўтган брифингда сўз очди.

Левитт АҚШ делегацияси Ислом Республикаси вакиллари билан музокара ўтказиш учун Исломободга йўл олишини тасдиқлаган. Музокарачилар рўйхатида вице-президент Вэнс йўқ, бироқ Покистонга АҚШ Президенти Дональд Трампнинг махсус вакили Стив Уиткофф ва Президентнинг куёви Жаред Кушнер учаётгани маълум.

“Биз, шубҳасиз, сўнгги икки кун ичида Эрон томонидан маълум бир илгарилашни кузатмоқдамиз. Президент эронликларни тинглаш учун Стив ва Жаредни юборишга қарор қилди, шунинг учун бу сафар улар нима дейишини кўрамиз”, дейди Оқ уй вакили.

Бунгача Дональд Трамп Эронга нисбатан янги баёнот бериб, унда “мамлакатнинг қолган қисмини портлатиб юбориш” билан таҳдид қилган. Америка етакчисининг сўзларига кўра, Эрон Ҳормуз бўғози ёпилишини эмас, балки кунига 500 миллион доллар ишлаб топиш учун унинг очилишини хоҳлайди.

Эслатиб ўтамиз, аввалроқ Дональд Трамп Эронга қарши ядро қуролидан фойдаланишни режалаштирмаётганини айтганди. Унинг сўзларига кўра, бундан ҳеч қандай мантиқ йўқ.