Трамп Эронга қарши ядровий қурол қўллаш нияти йўқлигини айтди

АҚШ Президенти Дональд Трамп Эронга қарши ядро қуролидан фойдаланишни режалаштирмаётганини айтди. Унинг сўзларига кўра, бундан ҳеч қандай мантиқ йўқ. Бу ҳақда у бугун, 24 апрель куни Оқ уйда журналистларга маълум қилди.

Журналистлар Америка етакчисидан ҳозирги можаро давомида Қўшма Штатлар томонидан Эронга қарши ядро қуроли қўлланилиши эҳтимоли ҳақида сўраган. Трамп бунга қарши эканини билдириб, берилган саволни “аҳмоқона” деб атаган.

“Нима учун мен ядро қуролидан фойдаланишим керак? Биз усиз ҳам оддий воситалар билан уларни бутунлай тор-мор этдик”, дейди АҚШ Президенти.

У ядро қуролини қўллаш мумкин эмас деб ҳисоблайди.

“Йўқ, мен ундан фойдаланмаган бўлардим. Ҳеч кимга ядро қуролини ишлатишга рухсат берилмаслиги керак”, дея қўшимча қилган Трамп.

Бунгача Дональд Трамп Эронга нисбатан янги баёнот бериб, унда “мамлакатнинг қолган қисмини портлатиб юбориш” билан таҳдид қилган эди. Америка етакчисининг фикрича, Эрон Ҳормуз бўғози ёпилишини эмас, балки кунига 500 миллион доллар ишлаб топиш учун унинг очилишини хоҳлайди.

Эслатиб ўтамиз, аввалроқ “Нимиц” туридаги USS George H.W. Bush авиаташувчиси Ҳинд океанига етиб боргани ҳақида хабар берилган эди. CNN хабарига кўра, Пентагон Эрон бўйича янги ҳужум режалари ишлаб чиқмоқда ва сулҳ бузилган тақдирда улар амалга оширилиши мумкин.