Трамп Исроил ва Ливан ўртасидаги сулҳ яна уч ҳафтага узайтирилганини айтди (видео)

АҚШ Президенти Дональд Трамп Исроил ва Ливан ўртасидаги ўт очишни тўхтатиш режими яна уч ҳафтага узайтирилишини эълон қилди. Бу ҳақда у ўзининг Truth Social тармоғида ёзиб қолдирди.

Унинг айтишича, бу қарор Вашингтонда ўтказилган “жуда самарали” музокаралардан сўнг қабул қилинган.

“Исроил ва Ливан ўртасидаги сулҳ уч ҳафтага узайтирилади. Яқин келажакда Исроил Бош вазири Биньямин Нетаньяху ва Ливан Президенти Жозеф Аунни қабул қилишни интиқлик билан кутяпман. Бу тарихий учрашувда иштирок этиш мен учун катта шараф бўлди”, деган Оқ уй раҳбари.

Оқ уйдаги Овал кабинетда бўлиб ўтган учрашувда АҚШ вице-президенти Жей Ди Вэнс, Давлат котиби Марко Рубио, шунингдек АҚШнинг Исроилдаги элчиси Майк Хаккаби ва Ливандаги элчиси Мишел Исса, ҳамда икки давлатнинг юқори мартабали вакиллари қатнашган.

Марко Рубио музокаралар якунида ўтказилган матбуот анжуманида Исроил ва Ливан “бир хил террор ташкилоти қурбони” эканини айтиб, бу билан “Ҳизбуллоҳ”ни назарда тутган. АҚШ элчиси Хаккаби эса ушбу гуруҳни кескин танқид қилган.

Трампнинг таъкидлашича, агар Исроилга қарши ҳужумлар давом этса, у ўзини ҳимоя қилишга мажбур бўлади ва унинг фикрича, “Ҳизбуллоҳ” бундай ҳаракатларни давом эттириши мумкин.

Шу билан бирга, 24 апрелга ўтар кечаси Исроил мудофаа армияси “Ҳизбуллоҳ” томонидан учирилган ракеталар тутиб қолинганини маълум қилган.

Эслатиб ўтамиз, Исроил ва Ливан ўртасидаги дастлабки 10 кунлик сулҳ 17 апрелдан кучга кирган эди. Трамп бу ҳақда бир кун олдин эълон қилган. Ушбу келишув АҚШда ўтказилган учрашувлардан сўнг юзага келган бўлиб, у Ливан ва Эрон вакиллари ўртасидаги 34 йилдан бери илк учрашув сифатида қайд этилган.