Андижонда ҳужжатсиз биологик фаол қўшимчаларни сотаётганлар ушланди (видео)

Андижонда қўшни давлатдан ноқонуний олиб келинган 226 млн 343 минг сўмлик биологик фаол қўшимчалар фош этилди. Бу ҳақда Давлат хавфсизлик хизмати хабар берди.

Қайд этилишича, Давлат хавфсизлик хизмати ходимлари томонидан Ички ишлар ва Божхона органлари билан ҳамкорликда Наманган шаҳрида ўтказилган тезкор тадбирда 1977 йилда туғилган маҳаллий фуқаро бошқарувидаги Damas русумли автомашина кўздан кечирилган.

Натижада автомашина салонида хорижда ишлаб чиқарилган, лекин тегишли ҳужжатлари бўлмаган 5 турдаги биологик фаол қўшимчалар борлиги маълум бўлган. Терговга қадар текширув давомида ушбу фуқаро ва унинг турмуш ўртоғи берган кўрсатмаларга кўра, қўшни давлатдан айланма йўллар орқали мамлакатга келтирилган ушбу маҳсулотлар Андижон вилояти ҳудудида қирғизистонлик эгасига топширилиши керак бўлган.

Сўнгра тезкор тадбир давом эттирилиб, Андижон вилоятининг Олтинкўл туманида биологик фаол қўшимчаларни қабул қилиб олган вақтида уларнинг ҳақиқий эгаси бўлган – Қирғиз Республикаси Жалолобод вилояти Манас шаҳрида яшовчи, 1976 йилда туғилган аёл ҳамда у билан бирга келган, Қўрғонтепа туманида истиқомат қилувчи, 1982 йилда туғилган таниши ҳам ушланган.

Аниқланишича, жами 2957 дона флаконда бўлган, капсула кўринишидаги “Самюн Ван”, “Черный тмин”, “Сенна Мекканская”, “Мумие Алтайское”, “Кыст аль-Хинди” номли биологик фаол қўшимчаларнинг умумий қиймати 226 млн 343 минг сўмни ташкил қилади.

Билдирилишича, ҳозирда ҳолат юзасидан қонунбузарларга нисбатан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ Хоразм вилоятининг Қўшкўпир туманида пайвандлаш ускунасига қарийб 1,5 кг “героин” яширган шахс ушланганди.